Hatutan.com, (26 Agostu 2022),Díli-Sekretáriu Estadu Komunikasaun Sosiál (SEKOMS), Merício Juvinal dos Reis “Akara” enkoraja  órgaun komunikasaun sosiál sira hotu ho mós jornalista  sira atu serbísu de’it tuir Kódigu Étika Jornalístika.

Lee Mós : DDF 2022 Loron Daruak, Hanoin Hikas Saudozu Bedinho Guterres Nia Mate

Sekretáriu Estadu Komunikasaun Sosiál (SEKOMS), Merício Juvinal dos Reis “Akara”. Foto/Racom Maubisse Mauloko

Merício Akara aprofunda katak bainhira jornalista ho mídia sira halo serbísu tuir de’it kódigu étika, laiha razaun ida atu ema halo intervensaun bá servisu jornalista sira nian.

SEKOMS Merício dos Reis “Akara” hateten, entidade hotu-hotu orgullu tanba índise liberdade imprensa  Timor Leste nian globalmente di’ak no intermu iha nivel rejiaun  Sudeste Aziátiku sai hanesan primeiru lugar. Ida-ne’e, Merício Akara hateten, nu’udár íkone no kontribui  influénsia boot bá nasaun sira iha Sudeste Aziátiku atu simu Timor-Leste nia adezaun bá ASEAN.

“Ita-nia íkone prestasaun liberdade imprensa ida-ne’e se bele ita kaer nafatin atu bele fó influensia  ka hada’et  bá membru ASEAN sira seluk,” SEKOM Merício Akara afirma iha nia diskursu enserramentu bá  semináriu internasionál Dili Dialogue Forum (DDF) 2022  ne’ebé hala’o iha Salaun Lalini Lariguto, CNE, Díli, Sesta (26/08/2022).

Iha ámbitu enserramentu atividade DDF 2022 ne’ebé sai hanesan programa anual Conselho de Imprensa Timor Leste nian ne’e, Merício Akara  fó parabéns bá Conselho Imprensa, bá mídia, jornalista ho oradór internasionál no nasionál, inklui partisipante sira hotu no oportunidade ne’e Merício Akara hakarak reforsa tan de’it bá hotu-hotu atu mantein liberdade imprensa no liberdade espresaun iha Timor Leste ho nia espíritu Konstituisaun RDTL artigu 40 ho 41.

Lee Mós : Prezidente Repúblika Husu Ministériu Públiku Arkiva Keixa Hasoru Jornalista

Timor-Leste, Akara tenik,  maske nasaun ki’ik maibé ninia liberdade imprensa no liberdade espresaun  tenke sai íkone no lori baáASEAN tamba iha tinan oin iha posibilidade boot Timor Leste tama ASEAN. Nune’e, tuir nia, iha Timor Leste papel Conselho de Imprensa no mídia importante atu garantia liberdade imprensa no liberdade espresaun.

Akara hateten, iha mós indivíduu balun ne’ebé bele konsidera nu’udár mos íkone ba liberdade imprensa no liberdade espresaun hanesan Prezidente Repúblika José Ramos-Horta hanesan mós íkone di’ak ida hodi garante liberdade imprensa iha Timor Leste.

Merício Akara husu atu kontinua dezenvolve plataforma konvensionál no dijitál, sira hotu-hotu tamba plataforma konvensionál sei nafatin merese tamba ferik-katuas no sidadaun sira ne’ebé hela iha área rurál sira sei presiza plataforma konvensionál.

Iha sidade joven sira plataforma dijitál mak sai hanesan sira-nia hahán loroloron. Tanba realidade hatudu molok ema ko’alia ho ema kaer uluk telemovel inklui saida de’it no molok hahú servisu ruma sempre kaer uluk mak telemovel tamba tuir survei ikus ne’ebé SEKOMS iha hatudu númeru sidadaun sira ne’ebé uza internet liu ona ema  1,3.

“Simu era dijitál hanesan kultura no oportunidade foun bá ekonomia, dezenvolvimentu teknolojia no liuliu dijitalizasaun bá umanidade atu meius hotu ne’ebé iha bá sivilizasaun umanu,  ema mak sentru bá dijitalizasaun,” Akara dehan nune’e Governu  kontinua apoia Conselho de Imprensa atu kontinua halo nia knaar hodi tau atensaun bá mídia hotu atu mídia hotu bele servidu tuir de’it kode etika tamba uainhira jornalista ida servisu tuir ona kode etika laiha razaun ida atu ema halo intervensaun bá servisu jornalista sira nian.

Jornalista: Vito Salvadór