Hatutan.com, (17 Abríl 2022), Díli-Komandu Jerál Polísia Nasionál Timor-Leste (PNTL) liuhosi atividade formatura jerál, Domingu (17/04/2022), koloka tan membru 300-resin bá munisípiu 13, inklui Rejiaun Administrativa Espesiál Oé-Cusse Ambeno (RAEOA), hodi asegura lala’ok eleisaun prezidensiál (ElPrez) segunda volta, iha 19 fulan-Abríl ne’e. 

Lee Mós : PNTL Reforsa Efetivu iha Sentru Votasaun Sira

Membru PNTL husi Unidade Espesiál Polísia (UEP). Foto/Média PNTL

Komandante Jerál PNTL, Komisáriu Faustino da Costa hateten, serimónia formatura jerál iha Kuartél Jerál nu’udár atividade kontinuasaun hosi loron 17 fulan-Marsu liubá, hodi koloka membru sira ba apoiu seguransa iha eleisaun prezidensiál ninian iha munisípiu sira, tanba sei menus rekursu.

“Ita hotu hatene katak iha munisípiu sira, menus rekursu. Maioria ita kuaze koloka hotu kedas, kuandu iha ronde dahuluk ita iha 200-resin), ohin, ita iha 300-resin mak ita fó hotu ba iha munisípiu sira. Ida-ne’e la inklui unidade destakadu sira,” Komandante Jerál PNTL, Komisáriu Faustino da Costa informa ba jornalista sira, hafoin serimónia kolokasaun membru sira-ne’e iha Kuartél Jerál PNTL, Caicoli, Díli.

Membru sira ne’ebé Komandu Jerál koloka ba munisípiu sir mai hosi kontinjénsia jerál, hanesan Centro de Formação Policia (CFP) iha  Akademia, Servisu Migrasaun (SM), Kuartél Jerál rasik, no sira ne’e, sei koloka hotu iha  sentru votasaun sira. Maibé, Unidade Especial da Policia (UEP) sei ajuda forsa rezerva sira iha munisípiu hotu, hodi halo patrulla movimentu.

Bazeia ba orientasaun komandu PNTL nian katak, membru sira ne’ebé koloka ba munisipiu ne’e, sei asegura seguransa  eleisaun segunda volta, to’o prosesu kontajen remata no akompaña urna (material sensitivu ho non-sensitivu) ba iha Sekretariadu Tékniku ba Administrasaun Eleitorál (STAE) iha munisípiu ida-idak.

Labele iha Atividade Ilegál

Maske iha kolokasaun ne’e, inklui mós membru sira balu hosi Unidade Patrullamentu Fronteira (UPF) ho Unidade Polísia Marítima (UPM) maibé, komandante jerál PNTL, Komisáriu Faustino da Costa mós dezafia nafatin ba komandante unidade sira, ho membru sira hotu katak, durante eleisaun segunda volta ne’e, labele akontese atividade ilegál hosi tasi ho rai-maran.

Jornalista: Rogério Pereira Cárceres