Hatutan.com, (13 Abríl 2022), Díli-Polísia Nasionál Timor Leste (PNTL), Tersa (12/04/2022), prende motór 90 no karreta 22 husi apoiante Kandidatu Prezidente Repúblika, José Manuel Ramos-Horta nian tanba viola lei kódigu esrada.

Notísia iha Relasaun: Kampaña Segunda Vota iha Díli, PNTL Prende Motór 48 hosi Apoiante Lú Olo

Apoiante Kandidatu PR José Ramos-Horta partisipa iha kampaña ne’ebé hala’o iha Tasi Tolu, Díli, 12 Abrïl 2022. Foto/Hatutan.com

“Ami halo operasaun ba ema hirak ne’ebé maka uza motór ho karreta la kumpre regra  no la kumpre ba lei kódigu estrada ninian. Ami halo apreensaun ba iha motór hamutuk 90, no karreta hamutuk 22,” Komandante PNTL Munisípiu Díli, Superintendente Xefe Henrique da Costa hateten ba jornalista sira, iha kna’ar fatin, Kuarta (13/04/2022).

Evidénsia ka transporte sira ne’ebé PNTL halo apreensaun, daudaun ne’e, komandu Díli liuhosi Unidade Tránzitu halo hela prosesu no aplika ona billete ba motorista sira balu, atu nune’e sira lori ba selu iha banku.

Antes ne’e, iha kampaña eleitorál ba eleisaun primeira volta, iha loron 15 fulan-Marsu 2022, bainhira halo komboiu hodi ba partisipa iha kampaña ikus iha Tasi-tolu, PNTL mós prende uluk ona motor hamutuk 112 hosi apoiante sira José-Horta nian.   

Jornalista: Rogério Pereira Cárceres