Hatutan.com, (21 Abríl 2022), Díli—Prezidente Repúblika (PR) Francisco Guterres Lú Olo, hato’o apresiasaun ba servisu instituisaun Polísia Nasionál Timor-Leste (PNTL), ne’ebé ho dedikasaun tomak asegura ona eleisaun prezidensiál primeira no segunda volta, iha 19 Marsu no 19 Abril 2022.

Komandante Jerál PNTL, Komisáriu Faustino da Costa hamutuk ho Segundu Komandante, Mateus Fernandes hasorumalu ho Prezidente Repúblika (PR) Francisco Guterres Lú Olo, Kinta (21/04/2022). Foto/Média PR.

“Prezidente Repúblika apresia ba PNTL nia serbisu hodi garante seguransa durante períudu kampaña eleisaun Prezidensiál ne’ebé la’o ho di’ak tebes, garante situasaun hakmatek iha tempu períudu kampaña hahú hosi primeira to’o segunda volta,” Komandante Jerál PNTL, Komisáriu Faustino da Costa hateten ba jornalista sira, hafoin enkontru ho Xefe Estadu, Kinta (21/04/2022).

Lee mós: José Ramos Horta Eleitu ba Prezidente Repúblika Períudu 2022-2027

PR Lú Olo husu ba PNTL atu mantein nafatin fó seguransa ho di’ak liután ba sidadaun hotu-hotu iha territóriu tomak.

Durante kampaña, PNTL rejista kazu krime eleitorál hamutuk lima. Maibé, krime sira ne’e, la inklui ho krime sira mak akontese hafoin 19 Abríl 2022 no halo koordenasaun ho parte Comissão Nacional de Eleições (CNE).

Krime sira ne’e akontese iha munisípiu Viqueque, Ainaro no Rejiaun Administrativa Espesiál Oecusse Ambeno (RAEOA).

Jornalista: Rogério Pereira Cárceres