Hatutan.com (29 Abríl 2022) Díli— To’o iha fulan-Marsu 2022, Progressu konstrusaun Portu Baía Tibar atinje ona 78%.

Progressu Konstrusaun Projetu Portu Baía Tibar atinje 78%. Foto/MOP.

Ekipa Unidade Jestaun Projetu, atualiza ona ba membru-sira Komisaun Interministeriál kona-bá progresu konstrusaun ne’e no reuniaun ne’e rasik prezide hosi Ministru Rui Gomes hanesan mós membru Komisaun Interministeriál.

Lee Mós: Kompañia Jonize Rehabilita Estrada Kuaze Metru 680 Hosi Tasi-Tolu To’o Raikotu

“Tuir planu, Projetu konstrusaun ne’e sei remata iha fulan-Outubru no hahú halo operasaun iha fulan-Novembru 2022,” Hatutan.com sita komunikadu.

Bainhira hahú halo operasaun, Portu foun no modernu ne’e, sei fasilita movimentu importasaun no esportasaun sasán sira, redús atrazu, kustu tranzasaun inklui tempu libertasaun kontentór, hodi bele fasilita di’ak liután empreza no sira-nia atividade komérsiu.

Operasaun Portu Baía Tibar ne’e sei fasilita efisiénsia iha servisu alfandegáriu ne’ebé konsidera hanesan pasu importante ida ba Ministériu Finansas, iha ámbitu Reforma Fiskál no Jestaun Finansas Públikas hanesan Reforma importante ida ne’ebé mak Governu anteriór sira inisia ona desde 2015.

Efisiénsia hirak ne’e mós sei ajuda Governu liuhosi Ministériu Finansas nomós utilizadór Portu hanesan importadór sira atu kolekta reseitas ho maneira ida ne’ebé lailais, justu no transparente. 

Portu foun no modernu ne’e sei inklui ka’is ida ho bersus rua no terminál kontentór ho kapasidade movimentasaun kontentór hamutuk millaun ida kada tinan.

Portu ne’e sei liga Timor-Leste ba merkadu komérsiu globál no sei hasa’e liután Timor-Leste ninia asesu komérsiu ba merkadoria sira hanesan agrikultura, turizmu, peskas, pekuária nomós indústria sira seluk – dalan ida atu ajuda Timor-Leste diversifika ninia produsaun.

Lee Mós: Konstrusaun Portu Baía Tibar Atinji 72%

Jornalista: Vito Salvadór