Hatutan.com, (19 Maiu 2022) Díli—Tenente Jenerál Reformadu Lere Anan Timur (LAT), iha ninia reflesaun ba selebrasaun tinan 20 restaurasaun indenpénsia katak, tempu ona atu lider nasionál sira hamutuk ho ukun-na’in hotu-hotu valoriza povu nia sakrifisiu no mehi ba ukun rasik-an.

Lere Anan Timur hasai foto hamutuk, hafoin sai oradór ba semináriu nasionál ne’ebé organiza hosi Kadalak Sulimutu, iha salaun São José Katedrál, Vila-Verde, Kinta (19/05/2022).

Timor Leste marka tán istória foun iha nia luta foun ba povu nia moris di’ak, tinan-ne’e kompleta tinan XX Timor-Leste nia independénsia ne’ebé restaura iha 20 de Maiu 2002.

Hosi ne’e, komunidade internasionál rekoñese Timor-Leste nia independénsia totál tanba iha 28 Novembru 1975 Timor-Leste proklama tiha ona nia independénsia unilaterál.

Lere Anan Timur hateten, hanesan lider nasionál ne’ebé sai mós komponente importante ba harii nasaun foun Timor-Leste desde hahú funu no lori funu ba to’o iha nia rohan sente preokupa ho futuru jerasaun foinsa’e sira nian, tanba ohin loron iha foinsa’e barak lakon esperansa ba sira nia moris rasik, laiha vontade atu luta ba sira nia futuru no iha foinsa’e barak sente dezanima ho situasaun politika rai laran ne’ebé laiha balansu ba moris sosiedade nian.

Timor-Leste nia destinu iha jerasaun foun sira nia liman, maibé katuas sira mós tenke husik hela buat di’ak ruma ba foinsa’e sira atu sira mós bele hatutan buat di’ak ne’ebé katuas sira rai-hela.

“Jerasaun tuan ne’ebé uluk hari nasaun ida-ne’e, la’ós barak maibé sira balun sei moris hanesan maun Xanana, Mari Alkatiri, Ramos-Horta no sira seluk. Tanba ne’e, la’ós buat hotu di’ak maibé iha di’ak no mós iha aat mós iha. Ne’ebé sira nia moris tantu iha funu laran hanesan mós ukun an sira sempre iha,” Lere Anan Timur hateten hafoin sai oradór ba semináriu nasionál ne’ebé organiza hosi Kadalak Sulimutu, iha salaun São José Katedrál, Vila-Verde, Kinta (19/05/2022).

Tinan lima ida-ne’e, tinan ida ne’ebé krusiál tebe-tebes, nia husu ba lider hotu-hotu atu fó sira nia atensaun tomak ba tinan lima ida ne’e, atu halo oinsa bele prepara joven jerasaun foun ba futuru rai no nasaun ida ne’e nian.

Jerasaun foinsa’e sira iha responsabilidade ba sira nia futuru no futuru nasaun nian hodi haree, reflete ba buat ne’ebé di’ak no mós buat hirak ne’ebé la loos atu hatutan buat ne’ebé di’ak ba nasaun no hakribi buat aat sira ne’ebé jerasaun tuan sira halo ba nasaun ne’e.

Jornalista: Vito Salvadór