Hatutan.com (25 Maiu 2022), Díli—Tribunál Distritál Díli (TDD) iha kuarta 25 fulan ne’e, kontinua halo julgamentu ba krime omesídiu agravadu dala rua no tentativa omesídiu ne’ebé deskonfia involve membru Polísia Nasionál Timor-Leste (PNTL), arguidu Mariano de Jesus ne’ebé utiliza pistola hodi hamate Mateus de Deus, Camilo da Conceição de Deus no hakanek lezadu Januário Pereira iha Lahane Orientál iha tinan 2021.

Tuir ajenda TDD katak, iha loron 25 fulan ne’e tuku 14:00 sei halo leitura sentensa ba arguidu, maibé liu hosi juiza kolektiva Ana Paula Fonseca, Maria Solana, Zulmira Auxiliadora deside halo alterasaun naun substansiál kona-bá faktu iha akuzasaun, tanba depois de produsaun de prova mósu tán faktu ne’ebé la tama iha akuzasaun maibé iha interese ba desizaun.

Lee Mós:Omesídiu Lahane, Arguidu Ameasadu Prizaun Tinan 28

Faktus hirak ne’ebé seidauk tama iha akuzasaun laran mak hanesan kauza hosi vitima Mateus de Deus nia mate tanba anemia aguda no maneira mate tanba omesídiu.

Nune’e mós ba lezadu Januário Pereira to’o agora la’o la normál kauza hosi akontesimentu refere, tanba ne’e Tribunál sei fo tempu loron lima ba Ministériu Públiku (MP) ne’ebé reprezenta hosi Prokuradór Jacinto Babo no advogadu privadu Câncio Freitas hodi prepara sira nia pozisaun prosesuál molok halo leitura sentensa.

Bazeia ba desizaun ne’e, Tribunál deside adi’a hikas julgamentu ba loron seluk hodi halo leitura sentensa.

Antes ne’e, liu hosi alegasaun Ministériu Públiku (MP) ne’ebé reprezenta hosi Prokuradór Jacinto Babo husu ba Tribunál atu aplika pena prizaun efetivu tinan 28 ba arguidu Mariano de Jesus ne’ebé utiliza pistola hodi hamate vitima Mateus de Deus, Camilo da Conceição de Deus no hakanek lezadu Januário Pereira iha Lahane Orientál iha tinan 2021.

Razaun MP husu pena ne’e, tanba konsidera faktus hotu ne’ebé konsta iha akuzasaun provadu hotu bazeia ba konviksaun arguidu, katak loos duni momentu ne’ebá nia utiliza pistola hodi tiru mate vítima Mateus de Deus, Camilo da Conceição de Deus no hakanek lezadu Januário Pereira iha Lahane Orientál.

Tuir akuzasaun hosi MP katak arguidu servisu nu’udár Polísia Nasionál Timor-Leste (PNTL), kolokadu iha Komandu Polísia Munisípiu Díli, nomeadamente iha Eskuadra Na’in-Feto, no relativa ho servisu ne’e PNTL atribui Pistola ida ho marka Glock 19, númeru seriál FHX 093.

Maibé iha loron 05 fulan Juñu tinan-2021 haleu tuku 02:00 madrugada, arguidu ba iha vitima Mateus de Deus ho Camilo da Conceição de Deus nia uma ne’ebé lokaliza iha aldeia Ainitas Hun, suku Lahane Orientál, Postu Administrativu Vera Cruz, hodi bolu vitima Camilo de Deus nia naran ho lian makas, tanba ne’e vitima Camilo de Deus hamutuk Equilides de Jesus sai hosi uma laran hodi ba hasoru arguidu.

Bainhira vitima Camilo de Deus ho Equilides de Jesus sai hosi uma laran, arguidu hateten ba vítima Camilo de Deus katak “ita bo’ot ba sa’e karreta, maibé vitima Camilio de Deus responde “ha’u la ba! tanba ó hatais sivil hela no kuandu ó la uja farda PNTL hau sei la ba sa’e karreta.

Arguidu kontinua obriga vítima Camilo hodi ba sa’e karreta, maibé vítima lakohi ho nune’e arguidu konsege dudu vítima Camilo de Deus nia hirus-matan no vítima Camilo mós halo reazen hodi dudu hasoru arguidu, ho situasaun ne’e halo arguidu nervozu no losu pistola iha kanotak hodi direta tiru ba vitima Camilo de Deus nia kabun parte loos hodi halo vitima monu kedan ba rai.

Rona kilat tarutu vitima Mateus de Deus halai sai ba liur hodi hakilar arguidu dehan Mariano, maibé arguidu kontinua halo reazen hodi tiru kona iha vitima Mateus de Deus nia hirus matan halo vitima monu ba rai.

Situasaun ne’e, akontese mós ba lezadu Januário Pereira, kuandu rona kilat tarutu lezadu sai kedan hosi uma laran ba liur no momentu ne’ebá lezadu hare vitima Mateus de Deus monu hela iha rai ho ran nakonu no arguidu kaer hela Pistola iha liman halo lezadu tauk no tenta hodi halai tama fali ba uma laran, maibe arguidu tiru lezadu hosi kotuk no kilat musan kona iha lezadu nia ain parte karuk halo lezadu monu hela iha odamatan oin.

Bainhira vitima Camilio de Deus, Mateus de Deus monutun ba rai ho ran ne’ebé nakonu inklui lezadu Januario Pereira, arguidu halai ses kedan hosi fatin akontesimentu.

Hosi akontesimentu ne’e rezulta Camilio de Deus, Mateus de Deus mate fatin no lezadu Januário Pereira kanek todan.

Tuir relatóriu teste balistika ba Pistola Glock 19 ho númeru serial FHX 093, ne’ebé mak fó sai hosi Labertóriu Polísia Sientifika (LPC) hatudu katak pistola musan sira halo mate vitima Mateus de Deus ho Camilo de Deus no halo kanek lezadu Januário Pereira ne’e, mai hosi Pistola ho maraka Glock 19 ho númeru seriál FHX O93 ne’ebé tiru sai hosi arguido.

Tanba ne’e, MP akuza arguidu ba pratika krime omesídiu agravadu dala rua no tentativa omesídiu ne’ebé previstu iha artigu 138 hosi kódigu penál TL.

Jornalista: Carmelita Isaac