Hatutan.com (28 Maiu 2022), Díli—Klínika Privada Bairru-Pité daudaun ne’e taka atividade ha’at relasiona ho atendimentu ba públiku hanesan internamentu jerál, partus, servisu sosiál no saúde feto ho mal nustrisaun.

Kondisaun Sala Maternidade Klínika Bairru-Pité. Foto/Klínika Bairru-Pité.

Atendimentu iha área haat ne’e taka ho razaun laiha finanseira tanba Governu liu hosi Ministériu Saúde (MS) seidauk halo transferénsia osan ho montante $258.000.

Lee Mós: Horta Promete Mellora Kondisaun Merkadu Hotu no Tau Matan Ba Klínika Bairru-Pité

Maski iha tinan ne’e, Parlamentu Nasionál (PN) halo ona aprovasaun ba osan ne’e liu hosi transferénsia públika Ministériu Saúde (MS) hodi fó apoiu ba Klínika Bairru-Pité ho montante $258.000, maibé to’o agora osan refere seidauk transfere ba Klinika ne’e.

“PN aprova ona osan ho montante $258.000 mai hosi proposta ne’ebé antes ne’e ami hato’o, maibé osan ne’e tranfere liu hosi tranferénsia públika MS. Maiski nune’e MS aloka de’it $68.000 no osan ne’e rasik to’o agora ami seidauk simu,” Diretór Klínika Bairru-Pité, Inácio dos Santos hateten ba Hatutan.com via telefónika, Sábadu (28/05/2022).

Inácio dos Santos  esplika, osan ne’e MS seidauk halo transferénsia tanba seidauk iha memorandum entre parte rua maski antes ne’e iha ona maibé expire ona.

Tanba ne’e, daudaun parte rua prepara ona nune’e iha semana oin bele finaliza memorandum ne’e no bainhira asina ona mak foin prosesa ba Ministériu Finansas (MF) no MS hodi halo tranferénsia.

Alende problema finanseira, klinika ne’e mos enfrenta problema seluk hanesan medikamentu estoke out, ekipamentu diagnostic la kompletu, tanba ne’e daudaun ne’e fó de’it atendimentu ba konsulta ambulatóriu, TBC, HIV, kankru ran no dentaria.

Maski nune’e, alternativa seluk ne’ebé Klínika halo hodi kontinua fó atendimentu ba públiku maka liu hosi kontribuisaun hosi komunidade no pasiente, tanba ne’e hosi fulan Marsu konsege hetan $2.000 resin no iha fulan Abríl $1.300 hodi responde ba funsionamentu klinika inklui osan tranporte ba funsionáriu no kombustível.

Antes ne’e Ministra Saúde, Odete Maria Freitas Belo hateten ba jornalista iha Palásiu Prezidente katak, nia la hatene kona-bá sala internamentu baixa iha Klínika Bairru-Pité taka ka loke maibé nia husu ba jestór sira iha klínika ne’e atu kontinua buka fundus hosi parte oioin hodi sustenta aan ba futuru.

Ministra ne’e rekoñese katak, iha duni orsamentu ne’ebé aprova hosi Parlamentu Nasionál (PN) ne’ebé iha númeru diferente, entre parte klinika ho MS rasik liuliu kona-bá montante ne’ebé atu halo transferénsia.

Tanba ne’e parte MS sei ko’alia diretamente ho parte Jestór sira klínika Bairru-Pité nian atu bele hetan solusaun hamutuk.

Tuir dadus hosi Klínika Biarru-Pité, totál númeru pasiente iha tinan ne’e hamutuk 2.000-resin ho númeru tipu moras ne’ebé as liu maka Infesaun Respirat’oriu Aguda (IRA) hamutuk 808, atendimentu ba inan isin rua 400-resin, TBC 45, HIV 205 kompostu hosi kazu foun 16.

Oras ne’e daudaun totál funsionáriu ne’ebé sei ativu hodi fó atendimentu iha Klínika Bairru-Pité hamutuk na’in 40.

Jornalista: Carmelita Isaac