Hatutan.com (10 Juñu 2022), Díli—Oras ne’e daudaun estabelesimentu prizaun Gleno Munisípiu Ermera, presiza tebes karreta atu utiliza ba servisu operasionál tanba karreta rua ne’ebé durante ne’e utiliza tuan ona.

Sekretária Estadu Igualdade no Inkluzaun (SEII) fó formasaun ba Prizioneiru sira iha Prizaun Gleno Kona-bá Kontrola Hahalok Hirus, (15/11/2021). Foto/SEII.

Hahú hosi tinan 2008, prizaun ne’e utiliza karreta célula ida ho hilux ida hodi apoiu servisu operasionál, maibé karreta ne’e kategoria tuan ho kondisaun ladún di’ak hodi difikulta servisu operasionál tanba fó risku ba vida guarda prizionál inklui dadur sira bainhira lori dadur sira ba ospitál no tuir julgamentu iha Tribunál Distitál Díli (TDD).

Lee Mós: Prizaun Becora-Gleno Submete Ona Lista Indultu 45, Suai La prienxe rekezitu

Maski situasaun ne’e hetan ona intervensaun hosi Ministériu Justisa (MJ) liu hosi apoiu osan manutensaun ne’ebé ho valór ki’ik, maibé seidauk bele rezolve situasaun ne’e.

“Prizaun seluk hanesan Suai no Becora simu karreta foun, maibé prizaun Gleno karreta Célula ne’ebé daudaun utiliza hanesan karreta antigu hosi tinan 2008 to’o agora no seidauk hetan atribuisaun karreta Célula foun. Tanba ne’e, kondisaun karreta tuan dalaruma travaun la hán ne’ebé fó risku ba dadur inklui vida guarda sira nian bainhira lori dadur ba ospitál no ba tuir julgamentu iha TDD. Maibé, iha segundu trimenestre ami hetan apoiu osan oitoan hosi MJ hodi halo manutensaun ki’ik la’ós bo’ot tanba gastus la to’o $500,” Diretór prizaun Gleno, Nito dos Santos hateten ba Hatutan.com via telefónika, Sesta (10/06/2022).

Difikuldade seluk ne’ebé prizaun ne’e hasoru maka, menus rekursu umanu liu-liu guarda prizionál feto, tanba maioria idade avansadu no daudaun ne’e guarda prizionál hamutuk 36 kompostu hosi feto na’in-sia mane na’in 27 hodi atende dadur hamutuk 106 kompostu hosi feto na’in 15 no mane na’in 91.

Estabelesimentu prizaun Gleno hato’o ona pedidu ba Ministériu Justisa no rezultadu hosi pedidu ne’e, iha tinan ne’e nia laran Minist’eriu sei atribui karreta célula foun.

Kona-bá menus rekursu umanu iha área guarda prizionál feto, nia sujere atu iha tinan oin bele halo rekrutamentu nune’e bele fó apoiu servisu ba estabelesimentu prizaun Gleno.

Jornalista: Carmelita Isaac