Hatutan.com, (02 Jullu 2022), Díli—Prezidente Repúblika (PR), José Ramos-Horta hahú halo planu no halibur seitór privadu nasionál sira, halibur apoiu umanitáriu ba vítima inundasaun iha parte kosta sul.

Prezidente Repúblika (PR), José Ramos-Horta hahú halo planu no halibur seitór privadu nasionál sira, ne’ebé hamahan-an iha Assosiasaun Komersiál Komunidade Xineza Timoroan (ACCCTL, sigla Portugés) ne’ebé lidera hosi emprezária feto Kathleen Gonçalves, atu halibur apoiu umanitáriu ba vítima inundasaun iha parte kosta sul, Sábadu (02/07/2022).

Inisiativa Xefe Estadu ne’e hetan kedasn resposta pozitiva hosi seitór privadu nasionál sira ne’ebé hamahan-an iha Assosiasaun Komersial Komunidade Cineza Timoroan (ACCCTL, sigla Portugés) ne’ebé lidera hosi emprezária feto Kathleen Gonçalves.

Lee Mós:Inundasaun, Prizioneiru 118 Okupa Provizóriu Aeroportu Suai

“Prezidente Repúblika konvida ACCCTL no membru emprezáriu timoroan sira ne’ebé halibur malu iha assosiasaun ne’e, atu haree ba asuntu ne’ebé loron hirak liu bá udan boot, halo komunidade lubuk ida hetan inundasaun iha rai laran liu-liu iha munisipiu Suai, Lospalos no Vikeke,” Kathleen Gonçalves hateten hafoin hasoru-malu ho Xefe Estadu iha Palásiu Prezidensiál, Bairru-Pité, Sesta (01/07/2022).

Advertisement

Kona-ba dadus komunidade hira mak afeitadu ba inundasaun, parte ACCCTL sei hein hosi ekipa Xefe Estadu tanba sira mak sei ba identifika hodi hatene uma-ka’in hira, familia vitima hira ne’ebé presiza tulun urjente.

“Inundasaun ne’e halo ita nia maluk barak mak feitadu. Ami asosiasaun sei fila fali ba atu prepara no haree oinsá atu oferese apoiu umanitáriu liu hosi ita nia Xefe Estadu bele lori apoiu ne’e ba to’o iha ita nia komunidade vitima sira. Ami mós sei apela ba ami nia membru Asosiasaun sira oinsá atu halibur apoiu umanitáriu ne’e,” Kathleen Gonçalves hateten.

Iha sorumutu ne’e Xefe Estadu hameno ba setór privadu sira atu ba futuru, kada fulan rua sei iha reuniaun regulár dala ida atu oinsá haree liu ba dezafiu ne’ebé setór privadu sira hasoru iha rai laran no buka dalan oinsá bele rezolve problema sira ne’e.

ACCCTL kontente tebes no konsidera ida ne’e presiza tebes atu bele hadi’a setór privadu nia servisu iha rai laran.

Jornalista: Vito Salvadór

Advertisement