Hatutan.com (04 Jullu 2022), Díli-Diretór Jerál Diresaun Jestaun Patrimóniu Estadu, Januário da Gama, durante ne’e,  sai hanesan fonte informasaun ida ne’ebé difisil ka susar tebetebes atu jornalista sira hasoru no halo entrevista.

Lee Mós : Ekipa Konjunta Halo Apreensaun ba Patrimóniu Estadu 10 Iha Díli

Karreta Estadu ne’ebé DGGPE rekollah husi ministeriu sira no estasiona iha Edifisiu DGGPE, Balide, Díli. Foto/Dok.Hatutan.com

Diresaun Jerál Jestaun Patrimóniu Estadu (DGGPE,sigla portugés) nu’udár instituisaun Estadu nian ida ne’ebé tutela diretamente bá Ministériu Finansas, ho nia knaar atu administra, halo inventarizasaun no arrola gestaun mobiliariu patrimóniu Estadu nian hotu, hanesan karreta, motór, no ekipamentu servisu nian hotu ne’ebé koloka iha órgaun Estadu direta no indireta.

Bazeia bá rezolusaun Governu númeru 130/2021 de 29 de Setembru, kona-bá jestaun e realokasaun de veíkulu do Estadu e Patrimóniu Estadu fó kompeténsia bá Diresaun Jerál Jestaun Patrimóniu Estadu (DGGPE) atu rekolla karreta Estadu hotu atu bele estasiona iha DGGPE, maibé DGGPE rasik seidauk iha jestaun ne’ebé di’ak hodi halo kontrolu bá karreta Estadu  “lubun” ne’ebé estasiona ona iha DGGPE.

Advertisement

Tuir observasaun Hatutan.com nian iha arredores DGGPE nian iha Balide, Díli, karreta Estadu ho marka oioin, hahú husi kijang Inova, Rush, Hilux, to’o Prado, “lubun” maka estasiona ona iha arredores DGGPE nian. Ironia liu, karreta hirak ne’e balun atu ferrujen tan ona no posivel boot karreta balun nia óleu atu maran ona tanba  DGGPE la iha rekursu sufisiente atu kontrola patrimóniu Estadu hirak ne’e no la iha duni rekursu natoon bele hamanas karreta sira  dadeer kada loron.

Iha enkontru dala barak ho liña ministériu sira, inklui autoridade kompetente sira husi munisípiu sira sempre levanta jestaun DGGPE nian, oinsá atu garante karreta sira bá estasiona iha DGGPE ne’e bele di’ak no aseguradu. Nune’e, la bele prejudika karreta ruma at tanba de’it karreta la halo operasaun no la hamanas.  

Reuniaun ikus  kona-bá “Konfirmasaun Dadus Jestaun Frota” ne’ebé hala’o iha Salaun Jestaun Patrimóniu Estadu nian iha Balide, Díli, husi loron 13 to’o loron 17 fulan-Juñu 2022, entidade barak husi liña ministériu levanta preokupasaun “sériu” kona-bá karreta Estadu nian ne’ebé estasiona iha DGGPE durante ne’e nunka hamanas. To’o karreta balun labadain moris nakonu iha karreta laran.

Lee Mós : DGGPE Seidauk iha Jestaun Di’ak Kontrolu Patrimóniu Estadu

Karreta Estadu ne’ebé DGGPE rekollah husi ministeriu sira no estasiona iha Edifisiu DGGPE, Balide, Díli. Foto/Dok.Hatutan.com

“Ami nia observasaun bá karreta Estadu nian sira ne’ebé estasiona iha DNPE ne’e lakleur at hotu ona no sei nakfilak sai besi-tua hotu, tanba la iha jestaun di’ak atu bele kontinua halo manutensaun bá karreta sira ne’e. Piór liu tan, durante ne’e ami haree la iha ema ruma husi DGGPE nian mak dader-dader hamanas karreta sira-ne’e. Ita atu atinje objetivu Governu nian bá halo poupansa bá gastu Estadu nian ka atu lori dezastre bá Estadu tanba karreta sira ne’e tinan ida mai tan sei sai hotu besi tua,” fonte ida husi instituisaun Estadu balun ne’ebé lakohi publika nia identidade haktuir bá Hatutan.com, bainhira remata enkontru entre liña ministériu sira ne’e.

Liga ho servisu DGGPE kona-bá jestaun bá patrimóniu Estadu ne’ebé estasiona iha DGGPE, Hatutan.com tenta halo konfirmasaun ho Diretór Jerál DGGPE, Januário da Gama, maibé nia la iha tempu atu atende jornalista Hatutan.com.

Advertisement

Molok ne’e, iha loron 27 fulan-Maiu 2022, hale’u tuku 10:00 dadeer, Hatutan.com hasoru Diretór Jerál DNPE nia sekretaria hodi husu atu halo entrevista, maibe ninia sekretaria informa katak diretór jerál  okupadu no husu jornalista atu halo entrevista bainhira iha eventu importante hodi konvida mídia sira.

Iha fali loron 04 fulan-Jullu 2022, Hatutan.com kontinua hakat bá to’o iha edifísiu DNPE atu bele halo entrevista ho Diretór Jerál DGGPE. Maibé, sekretaria Diretór Jerál DGGPE nian lia tun dehan, diretór jerál okupadu ho servisu no la bele atende entrevista ho jornalista.

“Karik Diretór Jerál nia karakter lakohi atu simu mídia sira, tanba ne’e nia rasik ko’alia katak nia maka lakohi atende no tempu laiha atu atende mídia ida por ida tanba ne’e bainhira iha eventu ruma maka ami manda konvite hodi entrevista dala ida de’it ho mídia hotu-hotu,” informa sekretaria Diretór Jerál  DGGPE ne’e hateten.

Alende ne’e, nia informa katak Diretór Jerál DGGPE maka lakohi atende mídia sira no hakarak konvida mídia hotu bá maka foin bele halo entrevista tanba Diretór Jerál laiha tempu atu atende mídia idak-idak.

Antes ne’e, Komisaun Anti-Korrupsaun (CAC, sigla portugés) ne’ebé rejista hela tanba Intensaun husi rezolusaun Governu refere atu redús despeza Estadu bá gastu ne’ebé liga ho manutensaun no kombustivel, maibé depois DNPE rekolla tiha Patrimóniu Estadu hirak ne’e sira la halo jestaun ho di’ak.

Advertisement

Jornalista : Carmelita Isaac