Hatutan.com, (11 Jullu 2022), Díli—Embaixada Timor-Leste (TL) iha rai-liur hanesan Portugál, Jakarta no nasaun sira seluk tenki selu taxa ba Governu ho valór $5.000 ba leten, maibé Embaixada sira ne’ebé iha TL aplika de’it valór simbólika, tanba ne’e la justu nune’e presiza iha armonizasaun.

Ministru Justisa, Tiago Amaral Sarmento. Foto/Mídia MJ

“Desde tinan 2002 TL fó oportunidade no espasu ba rai ho uma ne’ebé Embaixada sira iha TL hodi uza ho kontratu, maibé maioria valór simbólika de’it. Signifika laiha taxa no sira selu de’it bee no eletrisidade no iha Embaixada balun selu de’it $5 simbóliku,” Ministru Justisa, Tiago Amaral Sarmento hateten iha Gabinete MJ, Segunda (11/07/2022).

Lee Mós: Embaixadór Xina Husu MJ Aselera Akordu Kooperasaun iha Área Justisa

Tuir loloos sira mós aplika valór simbólika ba TL nia embaixada iha sira nia nasaun, maibé ne’e la akontese tanba iha ema nia rain TL selu to’o $5.000 ba leten kompostu hosi uma, rai no seluk-seluk tán ne’ebé la Justu.

Tanba ne’e, presiza iha armonizasaun hodi haree fali lejislasaun no akordu ne’ebé iha, nune’e bele kumpri prinsípiu internasionál ne’ebé iha hodi implementa prinsípiu resiprosidade atu bele kesi nasaun ne’ebé iha relasaun ba malu.

Atu rezolve problema hirak-ne’e, daudaun ne’e MJ hahú halo diskusaun ho Embaixadór Estadus Unidos Amérika iha Timor Leste (TL) no iha ona faze ikus nian hodi implementa prinsípiu resiprosidade.

Iha prinsipiu resiprosidade ho EUA ne’e hahú implementa ona, maske seidauk asina akordu tanba husi EUA hatudu ona rai rua iha Washington no Nova Iorke ba Embaixada TL nian iha EUA, nune’e mós TL fó ona fatin ne’ebé daudaun EUA uza hela.

“Parte rua sei ajuda malu. Ezemplu iha ne’e ita hatudu rai ba sira hodi uza nu’udár sira nia embaixada maka iha EUA mós sei hatudu rai ruma ba TL  nu’udár Embaixada Timor nian iha EUA,” Tiago Amaral Sarmento informa.

Tanba ne’e, iha fulan kotuk  Embaixadór EUA liu husi MNEK  hateten ona katak  Governu Amerikanu  fó fatin rua ba TL  iha Washington no Nova Iorke no TL mós sei haree fatin iha TL liu-liu  fatin ida ne’ebé atualmente  Embaixada Amerika uza hela.

Tuir planu, iha tempu besik sei asina akordu hodi halo armonizasaun tanba sei iha kestaun tékniku ida rua ne’ebé presiza finaliza, nune’e Timor-Leste ho EUA bele implementa ona prinsípiu  resiprosidade.

Jornalista: Carmelita Isaac