Hatutan.com, (13 Jullu 2022), Díli—Governu liuhosi reuniaun Konsellu Ministru (KM), aprova ona deliberasaun ida hodi autoriza membru governu na’in-tolu, atu akompaña vizita Estadu hosi Prezidente Repúblika (PR), José Ramos-Horta, ba nasaun viziñu Repúblika Indonézia.

Ministru Prezidénsia Konsellu Ministru (MPKM), Fidelis Manuel Leite Magalhães.

Membru governu ne’ebé KM autoriza mak hanesan, Ministru Agrikultura no Peska (MAP), Pedro dos Reis, Ministru Turizmu Komérsiu no Indústria (MTKI), José Lucas do Carmo da Silva ho Ministru Transporte no Komunikasaun (MTK), José Agostinho da Silva.

Lee Mós: PN Autoriza Ramos-Horta Vizita Estadu Bá Indonézia

“Konsellu Ministru autoriza ministru sira ho asuntu hirak ne’ebé relasiona ho planu exelénsia Prezidente Repúblika nian ne’ebé mak sei ba hala’o vizita Estadu iha Indonéza. Durante vizita ne’e, membru governu na’in-hirak ne’e mak sei akompaña,” Ministru Prezidénsia Konsellu Ministru (MPKM), Fidelis Manuel Leite Magalhães hatete hafoin sorumutu Konsellu Ministru, iha Palásiu Governu, Díli, Kuarta (13/07/2022).

Prezensa membru governu na’in-tolu ne’e iha Indonézia ho objetivu atu bele selebra akordu sira ka memorandu sira entendimentu nian ho parte Estadu Repúblika Indonézia iha área idaidak nian.

Durante vizita sira iha Repúblika Indonézia, Ministru Agrikultura no Peska (MAP), Pedro dos Reis, sei assina memorandu entendimentu ida ho parte Indonézia nian kona-bá kooperasaun iha área agrókola nian.

Ministru Turizmu Komérsiu no Indústria (MTKI), José Lucas do Carmo da Silva, sei asina memorandu entendimentu ida ho ninia omólogu Indonézia nian, iha área komérsiu, no mós iha área kualidade nian, hodi bele halo liután kooperasaun ne’ebé di’ak entre Badan Poom Indonézia nian, ho IQTL (Instituto Qualidade Timor-Leste).

“Tan ne’e nia área sira ne’e hanesan halo padronizasaun ba área Metrolojia, hanesan sukat nian, nune’e padraun ida ba sukat sira, nomós padroniza iha kualidade halo ho Indonézia,” Fidelis hateten.

Ministru Transporte no Komunikasaun (MTK), José Agostinho da Silva sei asina memorandu entendimentu ida ho MTK Indonézia nian atu bele fasilita movimentu autokarru sira hosi TL ba Indonézia (NTT) no hosi NTT mai TL.

Konsellu Ministru mós autoriza nafatin Ministru José Agostinho da Silva hodi bele asina memorandu entendimentu ida ho parte Badang Metereologi Indonézia nian.

Iha okaziaun ne’ebá mós, Ministru José Agostinho da Silva sei bele asina memorandu entendimentu ida tán ho Ministériu Komunikasaun no Informátika Repúblika Indonézia (MKIRI) nian, kona-bá kooperasaun iha área komunikasaun no informátika.

Objetivu hosi selebrasaun akordu ida-ne’e atu bele hadi’a liután kooperasaun iha área komunikasaun no informátika entre TL ho Indonézia.

Tuir planu, iha Kuarta (18/07/2022), delegasaun sei arranka dala-ida ho Xefe Estadu Ramos-Horta, ba Repúblikua Indonézia hodi hala’o vizita Estadu.

Jornalista: Rogério Pereira Cárceres