Hatutan.com, (10 Agostu 2022), Díli—Autoridade Aduaneira to’o iha Fulan Dahuluk, Trimestre Datoluk tinan 2022 kolekta ona reseitas aduaneira hamutuk $40.589.715,76 ba kofre Estadu.

Ministru Finansas, Rui Augusto Gomes. Foto/MF.

“Fontes reseitas ne’e maioria mai hosi portu, aeroportu, fronteira Batugade no Salele,” Hatutan.com sita komunikadu.

Lee Mós:“Janela Únika Nasionál” Sei Ajuda Autoridade Aduaneira Atu Kolleta Reseita ho Transparente

Tuir previzaun, to’o iha tinan ida-ne’e nia rohan Autoridade Aduaneira bele hetan reseitas aduaneira liu fali tinan kotuk ne’ebé ho montante totál millaun $67,9.

Ministru Finansas, Rui Gomes hateten “Iha tempu badak nia laran, Autoridade Aduaneira sei muda sai husi Portu Díli ba Portu Baía Tibar. Ita espera katak ho kondisaun servisus foun ne’ebé di’ak liu ne’e, bele kontribui ba hasa’e tan Ita-nia reseitas mai kofre Estadu hodi hamenus Ita-nia dependénsia ba Fundu Minarai.”

Daudaun ne’e Ministériu Finansas implementa hela Reforma oioin. Iha fulan hirak tuir-mai, sei avansa ho Lei Tributária no instrumentu sira seluk atu fó mós kbiit ba Autoridade Tributária atu bele rekolla tán reseitas, halakon evazaun fiskál no aumenta efikásia iha administrasaun rekolla reseitas doméstika.

Jornalista: Vito Salvadór