Hatutan.com, (25 Agostu 2022), Díli-Sekretariadu Organizasaun Mundial Komersiu (OMK) Timor-Leste ne’ebé tutela iha Unidade Organizasaun Mundial Komérsiu hosi Ministru Koordenadór bá Asuntu Ekonómiku (MCAE), Sesta  aban (26/08/2022), iha salaun Delta Nova, Díli, sei realiza sorumutuk konsultasaun kona-bá prosesu adezaun Timor-Leste bá OMK ho funsionáriu hotu hosi ajénsia autónomu Servisu Rejistrasaun no Verifikasaun Emprezariál, Institutu Públiku (SERVE, I.P.).

Lee Mós : Adezaun Bá OMK Fó Impaktu Pozitivu Bá Ekonomia TL

Grupu Traballu Adezaun Timor-Leste (TL) bá Organizasaun Mundiál Komérsiu (OMK) . Foto/Espesiál

Konsultasaun no koordenasaun nu’udár parte integradu hodi hamosu konfiansa públiku kona-bá prosesu adezaun Timor-Leste  bá Organizasaun Mundiál Komérsiu (OMK) ne’ebé  hatudu avansu  signifikativu haktuir hosi roteiru indikativu ne’ebé iha.  

Komunikadu imprensa ne’ebé Hatutan.com asesu hosi Ministériu Koordenadór bá Asuntu Ekonómiku, relata katak  kompromisu Governu Timor-Leste iha prosesu ne’e hatudu liuhosi vontade tomak ne’ebé realiza tiha ona  Reuniaun Grupu Traballu Dahuluk iha loron 20 fulan-Outubru 2020, Daruak iha loron 29 fulan-Jullu 2021 no Datoluk iha loron 29 fulan-Abríl 2022.

Oras ne’e, Governu Timor-Leste liuhosi Xefe Negosiador atuál Ministru Koordenadór ba Asuntu Ekonómiku (MCAE), Joaquim Amaral ho nia komitiva prepara hodi kontinua partisipa iha Reuniaun Grupu Traballu Dahaat ne’ebé tuir kalendáriu hosi Sekretariadu OMK iha Jenebra sei realiza iha fulan-Setembru 2022.

 Reuniaun Grupu Traballu Dahaat  sei sai momentu oportuna bá Timor-Leste hodi demonstra Timor-Leste nia kompromisu bá  nasaun sira membru OMK sseluk kona-bá prontidaun  Timor-Leste iha asuntu ne’e.

Ajenda seluk ne’ebé konsidera importante hodi hatudu vontade Timor-Leste nian durante Reuniaun Grupu Traballu Dahaat ne’e, Timor-Leste sei kontinua hodi  konklui prosesu negosiasaun  bilateral ho nasaun sira membru OMK seluk hanesan Kanadá, Uniaun Europeia, Indonézia, Japaun, Filipinas, Estadus Unidus no Kamboja.

Esforsu hotu ne’ebé oras ne’e lidera hosi Ministru Joaquim Amaral hodi sai nasaun membru bá Organizasaun Mundial Komérsiu presiza dizemina no transmite bá nivel   sosiedade hotu hodi konstrui konsiénsia mútua katak,  Timor-Leste hetan ona sinál pozitivu iha tempu besik mai hodi sai nasaun membru OMK.

Konsultasaun ho elementu hotu iha nasaun ne’e tantu husi instituisaun Governu no  públiku nu’udár responsabilidade  hodi la esklui timoroan sira seluk iha prosesu ne’e antes Timor-Leste sai  membru OMK.

Jornalista : Carmelita Isaac