Hatutan.com, (31 Agostu 2022), Díli—Prosesu pagamentu ba idozu no inválidus iha territóriu nasionál atinje ona 80% no tuir oráriu ne’ebé Banco Nacional Comércio Timor Leste (BNCTL) sei termina iha fulan Setembru 2022.

Pagamentu ba idozu sira halo tuir oráriu, tanba idozu sira iha territóriu nasionál kuaze 100.000 tanba ne’e BNCTL labele selu dala ida.

Lee Mós: Baze Hosi Subsídiu ba Idozu no Inválidus

BNCTL hasai ona oráriu no prosesu pagamentu bazeia ba oráriu ne’ebé iha no másimu fulan tolu, atu halo atendimentu tuir suku.

“Balun seidauk hetan, tanba seidauk to’o iha suku. Balun ne’ebé seidauk foti bele mai iha BNCTL atu foti sira nia osan,” Diretór ezekutivu BNCTL, Brígido de Sousa hateten iha Palásiu Prezidensiál Nicolau Lobato Bairru-Pité, Kuarta (31/08/2022).

Prosesu pagamentu ba idozu no inválidu sira ne’e presiza tempu, maibé oras-ne’e daudaun banku halo esforsu no ekipa BNCTL rasik oras-ne’e halo hela pagamentu iha suku sira, hein katak bele kompleta iha Setembru nia laran.

“Ita nafatin halo atendimentu, kliente balun liuliu ferik katuas sira ne’ebé hakarak foti uza kartaun ATM bele ba apalika iha BCNTL atu hetan kartaun,” nia informa.

Mákina ATM BNCTL ne’ebé oras-ne’e monta iha Díli laran hamutuk 30-resin la inklui iha munisipiu no Rejiaun Administrativa Espesiál Oecusse Ambeno (RAEOA).

Jornalista: Vito Salvadór