Hatutan.com, (20 Setembru 2022), Baucau-Xefe Estadu Maiór FALINTIL-Forsa Defeza Timor-Leste (F-FDTL), Tenente Jenerál Domingos Raúl “Falur Rate Laek”,  iha tempu badak, sei nomeia hikas nia ofisial superior ida ho background veteranu, atu bele substitui fali Koronel Renilde Corte Real Guterres e Silva, bá pozisaun nu’udár Xefe Kaza Militár iha Prezidensia  Repúblika.

Lee Mós : Komandu F-FDTL Nomeia Tenente Coronel Henrique Piedade ho João Bosco Lidera Batallaun Norte-Súl

Koronel Renilde Corte Real Guterres e Silva. Foto/Espesiál

Razaun halo nomeasaun foun ne’e, tanba Koronel Renilde Corte Real Guterres e Silva, hetan demisaun ho ‘urjentemente’ hosi Prezidente Repúblika (PR), José Ramos-Horta, tanba iha informasaun katak, mosu ‘naksalak’ balu iha ordém servisu no prosesu sira kona-bá foti desizaun nian. Ho nune’e, PR Ramos-Horta, hakarak ‘de’it’ veteranu ida mak tenke bá substitui fali.

“Ohin ne’e, la’ós halo nomeasaun bá kaza militár. Kaza militár ne’e buat seluk ida. Purtantu, ha’u enkarrega hela, Ajudante Kampu, Majór Francisco da Silva, para nia superviziona, no tempu oin mai, ha’u halo diálogu ho Prezidente Repúblika tanba Prezidente Repúblika hakarak veteranu ida fali, ne’ebé, depois ha’u sei diálogu ho sira, para depois sei buka solusaun bá rezolve problema ida Xefe Kaza Militár ne’e,” Tenente Jenerál Falur Rate Laek, hateten bá jornalista sira, hafoin seremónia nomeasaun bá komandante F-FDTL na’in-rua  iha baze Komponente Terrestre Primeiru Batallaun nian iha Baucau, Tersa (20/09/2022).

Advertisement

Kona-bá atu nomeia fali veteranu ida ne’ebé no se loos, Falur Rate Laek dehan, ida ne’e depende bá desizaun, tanba presija halo mós konsultasaun ho PR Ramor-Horta, tanba Prezidente Repúblika hakarak Xefe Kaza Militár ida ne’ebé atu bá ne’e tenke ema veteranu.

La’os ne’e de’it, membru F-FDTL liu-liu sira ne’ebé kualidade hanesan Ofisial Superior ne’ebé atu troka ne’e, tenke submete mós ninia dokumentu sira hanesan Curriculum Vitae (CV), nune’e, komandu bele hatene ninia kapasidade formasaun sira ne’e hotu, depois mak halo apresiasaun.

“Iha ne’ebá ne’e, koletivu ida mak iha ne’ebá. Ne’ebé, F-FDTL mós iha koletivu ida. Ha’u atu halo nomeiasaun ida, ha’u tenke konsulta, ha’u nia Estadu maior iha, liu-liu pesoal sira ne’ebé mak halo jestaun bá rekursu umanu. Ita agora, ita implementa sistema ne’e. Agora sistema ne’e mak saida, ne’e mak lei,” Falur Rate Laek, esplika.

Hatán kona-bá karik, Coronel Renilde Corte Real Guterres e Silva, sai hosi Xefe Kaza Militár ne’e, tanba nia rasik mak hakarak rezigna-aan, Tenente Jenerál Falur, dehan, ne’e la’os kestaun rezigna aan tanba iha vida militár laiha liafuan rezigna aan tun-sa’e.

“Ne’e ordém, ó simu ordém ohin, nia haree, mobiliza, nia hakarak bá fali, bá de’it. Ha’u mós ohin iha ne’e, loron ida, desizaun politika ida mai, ohin, ha’u sai bá fali ministru, ha’u ba fali ministru. Mais ha’u nia kbi’it la to’o para sai ministru. Ha’u bá fali de’it povu ne’e, ha’u tama tán ho ha’u nia maluk veteranu sira iha ne’ebá, para ami deut malu tun sa’e ne’e, ha’u bele halo ida ne’e,” Falur Rate Laek, hateten ho hamnasa.

Advertisement

Hatutan.com, tenta ona halo konfirmasaun bá asuntu ne’e  ho Prezidente Repúblika, José Ramos-Horta, hafoin semináriu ho tema “A declaração de Abu Dhabi, a Fraternidade Humana em Prol da Paz Mundial”, iha Universidade Católitca Timorense (UCT), Balide, Dili. Infelizmente, Ramos-Horta, rezeita fó nia komentáriu.

Jornalista: Rogério Pereira Cárceres

Advertisement