Hatutan.com, (18 Outubru 2022), Díli—Ministru Justisa (MJ), Tiago Amaral Sarmento kestiona kualidade konstrusaun morru protesaun iha estabelesimentu prizionál Gleno.

Ministru Justisa (MJ), Tiago Amaral Sarmento kestiona kualidade konstrusaun morru protesaun iha estabelesimentu prizionál Gleno, hafoin halo inspesaun ba morru ne’e, Segunda (17/10/2022). Foto/MJ.

Ministru kestiona ne’e hafoin simu no hato’o omenajen ba matebian Luisa de Araújo, iha Estabelesimentu Prizional Gleno, Ermera, no diretamente ba halo inspesaun ba morru ne’e, Segunda (17/10/2022).

Lee Mós:Prizaun Gleno Presiza Karreta Operasionál

“Hafoin halo observasaun direta ba prosesu no kondisaun morru interna Gleno Ermera, Ministru Justisa kestiona kualida konstrusaun morru ne’e,” Hatutan.com sita komunikadu.

Ho situasaun ne’e maka, Ministru Justisa Tiago Amaral Sarmento hasoru malu kedan ho na’in ba kompañia Jomi Uni pessoal, ne’ebé halo konstrusaun ba morru ne’e.

Ministru husu atu kompañia Jomi Uni Pessoal Lda, responsabiliza no esklaresimentu hosi Ajénsia Dezenvolvimentu Nasionál (AND) no ba Ministériu Obras Públika (MOP) Diresaun Laboratóriu ba autorizasaun ba kompañia hodi utiliza materiál ka rai-henek lokál iha Ermera.

Tuir enjeñeriu kompañia Jumi Unipesoal Lda katak, Obras Publika mós admite kompañia atu uza rai henek lokál ba konstrusaun refere, maibé tuir observasaun Ministru Justisa nota katak, morru protesaun ne’e laiha kualidade tanba rai henek ne’ebé kompañia uza laiha kualidade, nune’e morru protesaun laiha duni kualiadade.

Tiago Amaral Sarmento mós esplika katak, morru protesaun ne’ebé laiha kualidade bele hamosu risku ba Servisu Guarda Prizionál sira, tanba dadur ruma ne’ebé iha interese hakarak halai sai hosi prizaun sira bele pika halimar morru hosi loron to’o kalan nia bele halai sai tia de’it.

“Rekluzu ida loron nia tur baku-baku halimar, to’o kalan nia bele halai sai tia de’it, no rai nakdoko nia bele ameasa boot,” Ministru Justisa esplika.

Tanba ne’e, Ministru Justisa husu solusaun ba kompañia no kompañia promete sei sobu hotu fali revoka ne’ebé iha no sei halo revoka foun no parte Minitériu Justisa mós sei adi’a pagamentu ba obra ne’ebé iha.

Ministru Justisa sei hein relatóriu sira hosi diretór no tékniku sira hafoin bele foti desizaun ba pagamentu ba konstrusaun morru ne’ebé ninia konstrusaun la’o hela daudaun no nota katak la iha kualidade.

Jornalista: Elio dos Santos da Costa