Hatutan.com, (17 Dezembru 202), Díli—Comissão Anti Corrupção (CAC) kontinua halo investigasaun ba prosesu instalasaun Set-top Box RTTL,E.P liu hosi rona testemuña sira atu identifika prezuizu Estadu hosi kazu ne’e.

Diretór Jerál Investigasaun CAC, José Verdial. Foto/Hatutan.com

Diretór Investigasaun CAC, José Verdiál hateten, CAC bolu testemuña sira mai no hosi prosesu investigasaun, rona testamuña sira, halo identifikasaun ba iha objetu krime sira depois iha finál maka bele konklui, bele mantein ho arguidu sira ne’ebé iha, bele mós aumenta tán arguidu.

Lee Mós: Kazu Projetu Set-Top Box RTTL, E.P, CAC Kontinua Halo Inkéritu bá Evidénsia Hosi Arguidu Sira

“Ministériu Públiku foin haruka mai iha fulan Dezembru ne’e nia laran, nune’e CAC kontinua tán halo investigasaun hodi identifika totál prezuizu ne’ebé mak Estadu sofre. Tanba ne’e, prosesu ne’e kontinua la’o hela hodi rona testamuña balun tán,” José Verdiál ba Hatutan.com via telefónika, Sábadu (17/12/2022).

Set-top Box/dexodificador RTTL,E.P ne’ebé komunidade fó fila hodi rai deit iha Sede Suku Fatuhada, Dili. Foto/Hatutan.com

Diretór Investigasaun ne’e hatutan, CAC hakarak atu finaliza kazu Set-Top Box RTTL,E.P ne’e ho lalais, maibé tanba tempu no instalasaun Set-top Box ne’e la’ós iha Díli de’it maibé kobre mós munisípiu balun. Tanba ne’e CAC presiza bá fila-fali terrenu atu bele identifika fila-fali saida mak sai hanesan objetu krime, nune’e presiza tempu oitoan tán.

“Ami hakarak finaliza iha fulan ida-ne’e, maibé seidauk iha serteza tanba ita haree ba tempu feriadu, loron bo’ot mós besik ona. Entaun labele kontinua servisu tanba investigasaun labele halo iha tempu feriadu,” nia informa.

Oras ne’e daudaun prosesu investigasaun ne’ebé CAC halo atu kontinua identifika de’it prezuizu ne’ebé Estadu sofre hosi prosesu instalasaun Set-top Box RTTL,E.P.

Jornalista: Vito Salvadór