Hatutan.com, (10 Janeiru 2023), Díli-Vendedór sira iha Merkadu Taibessi, Tersa (10/01/2023), hale’u tuku 12:45 Otl, hakfodak no ta’uk tanba derepente mosu inséndiu ne’ebé rezulta baraka ka fatin negosiante nian lubun ahi-han to’o mutuk.

Lee Mós : Ahi Han Uma 53 Iha Merkadu Taibesi, Vítima 356 Okupa Eis Kuartél Militár Portugés

Ekipa Bombeiru halo esforsu hamate ahi ne’ebé han hela Merkadu Taibessi, Tersa (10/01/2023). Foto/Elio dos Santos da Costa

Nunes Godinho Ximenes, vendedór Merkadu Taibessi nu’udár mós vítima hosi inséndiu ne’e  informa, kauza hosi inséndiu ne’e tanba maluk vendedór balun liga hela chaleira elétrica  hodi nono bee-manas no haluha dezliga to’o bee-maran nune’e chaleira elétrica rebenta.

Nia haktuir kronolojia katak, hafoin nono tiha bee-manas, maluk negosiante ne’e  la’o tiha bá fa’an ninia sasán iha parte sorin no haluha atu kontrola ka dezliga. Ikus mai, bee-manas ne’e maran, rezulta ahi-han kedan hosi fiu chaleira elétrica nian hodi da’et to’o baraka negosiante sira seluk nian.

“Akontesimentu ida-ne’e mosu iha meiudia  tuku 12:45 Otl. Akontesimentu ida-ne’e mai hosi ami nia viziñu, ne’ebé mak nono bee-manas iha chaleira elétrica, depois nia la kontrola. Depois familia balu bá tiha festa, iha tia balu mak hein iha ne’ebá. Entaun, tia liga  hela bee iha chaleira elétrica bá fa’an tiha nia hena iha dook oitoan hosi fatin ne’ebé nia hela bá. Entaun, bee ne’e maran iha chaleira elétrica laran, entaun nabeen hosi fiu ne’e, entaun nakdaet ona bá listrik, ahi komesa mosu hosi fiu eletrisidade,” Nunes Godinho Ximenes, hateten bá jornalista sira iha fatin akontesimentu.

Segundu Komandante Bombeiru Munisípiu Díli, Nordin da Silva Mendonça haktuir, iha tuku 13:45 Otl, sira simu informasaun hosi komunidade balu katak, iha kazu ahi han Merkadu Taibessi.

“Informasaun ne’ebé ami simu kona-bá ahi-han ne’e, iha tuku 13:45 Otl, ami to’o iha lokal akontesimentu, ahi komesa boot ona. Ami ho ekipa ida, kompostu hosi karreta tolu. Ami konsege kombate duni iha sorin ne’ebá, para evita labele da’et fali bá kotuk, no to’o iha sorin ne’ebá,” Nordin da Silva Mendonça, hateten.

Ekipa Bombeiru halo esforsu hamate ahi ne’ebé han hela Merkadu Taibessi, Tersa (10/01/2023). Foto/Elio dos Santos da Costa

Prezidente Autoridade Munisípiu (PAM) Díli, Guilermina Filomena Saldanha Ribeiro, dehan, atu responde bá insendiu ne’e, autoridade Munisípiu Dili, sei apoia tuir saida mak antes ne’e sira halo ona iha fatin seluk. Maibé, provizóriu PAM Díli seidauk hetan dadus ruma hosi vitima sira, kona-bá ema ka vendedór hira mak sai vitima, tanba sei hein prosesu.

“Loos duni, ita haree katak, ahi ne’e mate ona, maka ekipa levantamentu dadus munisípiu Dili nian sei tun bá, hamutuk ho vitima sira, ho jestór merkadu, atu haree vitima hira mak nia fatin negósiu no sasán negósiu nian ahi han. Agora, kona-bá atendimentu, saida mak autoridade atu fó, durante ida-ne’e, ami fó hanesan mós, sira horibainhira ahi han ne’e,” Guilermina Filomena Saldanha Ribeiro hateten.

PAM Díli sei fó asisténsia médika bá vitima sira, tanba iha labarik barak mós mak hela hotu iha área ne’e, balu trauma, nune’e presija konsulta bá sira nia saúde. Apoiu seluk maka, ekipa téknika sira sei halo fila-fali levantamentu atu oinsá halo fali rehabilitasaun hanesan estragu sira ne’ebé PAM Díli halo tiha ona.

“Kona-bá apoiu hahan, ita tenke haree, maizumenus fó hahan ne’e, sira hela iha ne’e ka iha uma. Katak merkadu ne’e la’ós fatin atu hela, mais sé sira presija dehan autoridade atu fó hahan, ami sei fó hahan durante loron tolu,” Gilermina Saldanha hateten.

Kona-bá informasaun hosi komunidade sira katak, insendiu ne’e mosu, tanba kauza ka sirkuitu hosi fiu eletrisidade, Gilermina Saldanha dehan, ida ne’e presija liuhosi prosesu investigasaun mak bele hatene.

Hatán bá estragu hirak ne’e, Governu liuhosi PAM Dili, sei la fó apoiu material konstrusaun ka rehabilitasaun, maibé parte autoridade sei ajuda konstrui fila-fali de’it fatin ne’ebé estragu ka ahi han, atu vendedór sira bele kontinua fa’an sira nia sasán.

Iha Kinta, 22 fulan-Dezembru 2022, hale’u tuku 23:00 Otl,  akontese mós inséndiu iha Merkadu Taibessi.

Ahi han mutuk uma 53 iha Merkadu Taibessi no membru família 356 ne’ebé sai vítima, oras-ne’e muda bá hela provizóriu iha eis edifísiu Kuartél Jerál Militár Portugés hodi hetan apoiu umanitária.

Jornalista: Rogério Pereira Cárceres