Hatutan.com, (17 Janeiru 2023), Díli—Orsamentu Jerál Estadu (OJE) tinan 2023 ne’ebé Prezidente Repúblika, José Ramos-Horta promulga iha 20 Dezembru 2022, distribui ona ba sistema finanseiru kada liña ministeriál no to’o Tersa ohin ezekuta ona $282.535, seidauk inklui saláriu fulan Janeiru nian.

Vise-Ministru Finansas, António Freitas atualiza ona ezekusaun ida-ne’e bá Primeiru Ministru, Taur Matan Ruak iha reuniaun semanál iha Palásiu Governu, Tersa (17/01/2023).

Lee Mós: Xefe Estadu Promulga OJE 2023 Billiaun $2,16

“Ezekusaun dahuluk hosi gabinete Prezidente Repúblika nian ho montante $250.000. Iha mós proposta balun mai hosi SNI $29.200 no mos IDN. Ida-ne’e mak Ministériu Finansas rejista,” António Freitas hateten.

Iha reuniaun ne’e Vise Ministru Finansas informa mós kona-bá prosesu bá projetu estratéjiku sira ne’ebé Timor-Leste hetan finansiamentu hosi impréstimu mak hanesan Aeroportu internasionál Nicolau Lobato iha ne’ebé nia prosesu tenderizasaun loke kedan desde tinan kotuk no agora iha faze evaluasaun proposta tékniku no KNA halo hela servisu ida-ne’e, iha fulan ida ne’e sei finaliza inklui halo finalizasaun ba proposta finanseiru.

MF mós sei ko’alia ho ADB ne’ebé fó empréstimu ba projetu Aeroportu internasionál Nicolau Lobato millaun $135 no governu liu husi Ministériu Finansas sei haree atu kontinua halo mós konsultasaun ho Tribunál de Kontas no lori mai konsellu Ministru atu halo aprovasaun.

“Bainhira buat hotu la’o di’ak, prosesu diskusaun sira la’o diak, kontratu ba projetu Aeroportu internasionál Nicolau Lobato sei selebra iha fulan Fevereiru nia rohan. Iha inísiu fulan Marsu primeira pedra bele hahú,” nia dehan.

Vise-Ministru ne’e informa mós ba Primeiru-Ministru liga mós ho apoiu exteriór ne’ebé Timor-Leste hetan hosi Japaun ba Aeroportu internasionál Nicolau Lobato, iha semana oin sei aprezenta ba Konsellu Ministru atu bele hetan aprovasaun deliberasaun atu bele fó autoridade ba Ministru hodi bele asina akordu ne’e.

Rekonstrusaun ba Aeroportu internasionál Nicolau Lobato sei la afeita ba movimentasaun transporte aero tanba Estensaun de pista ba Aeroportu internasionál ne’e sei estende uluk ba tasi nune’e sei la afeita no terminal tuan ne’e sei kontinua no gran terminal ida foun sei foti mai kotuk.

Jornalista: Vito Salvadór