Hatutan.com, (22 Janeiru 2023), Díli—Durante Partsipa iha Forúm Ekonómiku Mundiál iha Davos, Suísa, Prezidente Repúbika (PR), José Ramos-Horta konsege vizibiliza Timor-Leste (TL) liuhosi intervensaun direta no halo promosaun ba mundu.

Parada Militár hodi simu Prezidente Repúblika (PR), Ramos-Horta iha Aeroportu Internasionál Nicolau Lobato Comoro, Domingu (22/01/2023) bainhira fila hosi Forum Ekonómiku Mundiál ne’ebé hala’o iha Sidade Davos, Suísa. Foto/Média PR.

“Timor hetan duni vizibilidade iha Suisa. La’ós de’it iha fatin ne’ebé formál maibé ami mós ko’alia iha konferênsia internasionál Nasaun Unidas nian ka seluk. Importante mak iha oportunidade fatin ida atu halo enkontru, diálogu barak tanba la’ós de’it tuur iha ne’eba ema ko’alia ka ha’u rasik halo intervensaun ida ka rua,” Ramos-Horta hateten asuntu ne’e iha Aeroportu Internasionál Nicolau Lobato Comoro, Domingu (22/01/2023) bainhira fila hosi Forum Ekonómiku Mundiál ne’ebé hala’o iha Sidade Davos, Suísa.

Lee Mós: Ramos-Horta Husu Sentru Komérsiu Internasionál Apoia Formasaun bá Rekursu Umanu TL

Partisipasaun TL iha Forum Ekonómiku Mundiál iha Davos, Suísa tanba hetan konvite mai hosi institutusaun World Economic Forum ne’ebé lá’ós sistema multilaterál, la’ós Estadu nian maibé ne’e professór ida iha Suisa mak kria institutusaun ne’e iha tinan 30 liu bá ho susesu tebes-tebes,  líder mundiál hotu-hotu ba hanesan Nasaun Unidas, líder polítika, líder intelektuál, ekonomista, kompañia bo-boot mak ba Suisa.

Tinan ida-ne’e sira konvida Timor Leste, Ramos-Horta nu’udár Prezidente Repúblika, konvida governu ne’ebé reprezenta hosi Ministra Negósiu Estranjeiru no Kooperasaun (MNEK) Adaljiza Magno.

Buat importante iha ekontru ne’e maka Ramos-Horta konsege halo enkontru bilaterál lubuk ida ho Prezidente, Primeiru Ministru, Ministru Negósiu Estranjeiru, líder sira, seitór privadu mundiál ne’ebé partsipa iha Suisa.

“Susesu maka ne’e, la’ós buat ruma enkontru halo lae, halo parte ita nia diplomásia sempre buka Timor marka prezensa, tanba Timor Leste úniku pais kiik no ki’ak ne’ebé partisipa iha Forum Ekonómiku Mundiál, laiha rai seluk husi Pasífiku, Áfrika ne’ebé kiik mezmu rai sira CPLP mós kuaze Timor úniku mak marka prezensa iha Suisa, purtantu buat sira ne’e importante ba Timor Leste,” Ramos-Horta subliña.

Jornalista: Vito Salvadór