Hatutan.com, (03 Fevereiru 2023), Díli—Suésia ho Alemaña lansa ona ninia konsuladu iha Timor-Leste (TL), iha Embaixada Portugál iha Díli.

Suésia ho Alemaña lansa ona ninia konsuladu iha Timor-Leste (TL), iha Embaixada Portugál iha Díli, Kinta (02/02/2023). Foto/Média PR.

Konsúl Onorária dezignada iha Timor-Leste hosi Suésia maka Mónica Mendes da Silva no Lena Lenzen hosi Alemaña.

Lee Mós: Prezidente Repúblika Simu Karta Kredensiál Hosi Nasaun 11

Prezidente Repúblika, José Ramos-Horta ne’ebé partisipa iha serimónia lansamentu ne’e konsidera  Konsuladu nasaun Europeia rua ne’e interesadu tebes.

“Ne’e serimónia interessante, ne’ebé organiza hosi Embaixadora Suésia no Alemaña iha Jakarta, iha ne’ebé sira nomeia sidadaun estranjeira rua, nu’udár Konsul Onorária Alemaña no Konsul Suésia,” Prezidente Repúblika José Ramos-Horta hateten iha komunikadu, Sesta (03/02/2023).

Ho abertura Konsuladu nasaun Europeia rua ne’e, Xefe Estadu fiar katak, sei fortalese relasaun entre Timor-Leste ho Alemaña no Suésia.

“Ha’u fiar katak, ita-nia relasaun ho nasaun rua, inklui Alemaña ne’ebé sei hahú fila-fali ho forsa, ha’u koñese ema lubuk ida, balun mai Timor ona. Ho deputadu hosi Alemaña sira mai iha ne’e iha fulan Outubru liu-ba, nune’e iha esperansa katak sei hahú fila-fali relasaun ne’e hamutuk ho rai sira seluk,’’  Ramos-Horta subliña.

Dezde fulan Maiu tinan 2022, Prezidente Repúblika José Ramos-Horta aposta ba reforsu kooperasaun ho nasaun seluk, liu-hosi vizita bá Indonézia, Austrália, Singapura, Malázia, Kambódia, Estadus Unidus Amérika no Brazil no mós partisipa iha eventu ne’ebé organiza hosi embaixada sira iha Díli no Ajénsia Internasionál Sira.

Iha Tersa-Feira ne’e, Embaixadór rezidente no naun rezidente husi nasaun 11 entrega karta krendensiál ba Prezidente Repúblika, hodi hametin kooperasaun ho Timor-Leste iha setór oi-oin.

Jornalista: Vito Salvadór