Hatutan.com, (24 Fevereiru 2023), Díli—Prezidente Repúblika (PR), José Ramos-Horta husu atu tékniku profisionál sira ne’ebé servisu iha órgaun eleitorál hanesan Sekretariadu Tékniku Administrasaun Eleitorál (STAE) no Komisaun Nasionál Elisaun (CNE) tenke profisionál no labele monu ba manipulasaun polítika, hodi hamonu integridade instituisaun.

Ramos-Horta hala’o enkontru ho Diretór Jerál STAE Acilino Manuel Branco no Prezidente CNE José Agustinho Belo inklui funsionáriu sira, iha salaun konferénsia STAE, Caicoli, Sesta (24/02/2023). Foto/Média PR.

Ramos-Horta halo apelu ne’e bainhira hala’o vizita ba STAE no halo mós sorumutu ho superiór sira órgaun eleitorál hanesan Diretór Jerál STAE Acilino Manuel Branco no Prezidente CNE José Agustinho Belo inklui funsionáriu sira, iha salaun konferénsia STAE, Caicoli, Sesta (24/02/2023).

Lee Mós: STAE Rejista Eleitór 878.786 no Sei Publika Kalendáriu Operasionál bá Siklu Eleitorál

“Ha’u halo apelu dala ida tán ba sira ne’ebé tékniku no profisionál, lalika monu iha reasaun politika no manipulasaun polítika, tanba to’o ikus sira ida ne’ebé profisionál ne’e kuandu halo sira nia funsaun ho integridade, sira sempre manan. Povu respeita sira hanesan instituisaun sira seluk kuandu halo servisu di’ak povu respeita no hakruk ba sira,” Ramos-Horta apela.

Xede Estadu haree katak, preparasaun ba eleisaun parlamentár nian, STAE ho CNE prepara ona órgaun eleitorál rua ne’e servisu makas loos.

“Ha’u iha konfiansa katak, eleisaun bele la’o kompletu no di’ak, laiha problema iha loron eleisaun. Haree katak tempu normál no sufisiente ba STAE no CNE atu halo preparasaun tanba iha Konstituisaun RDTL hateten Prezidente Repúblika anunsia ka dekreta loron eleisaun iha loron 80 antes eleisaun realiza no Prezidente Repúblika la inventa buat oin-oin,”  Ramos-Horta subliña.

Iha fatin hanesan, Diretór Jerál STAE, Acilino Manuel Branco hateten hanesan orgaun eleitorál sente priviléjiadu tamba hetan vizita hosi Xefe Estadu no aproveita momentu kmanek ida ne’e atu informa katak STAE iha funsionáriu hamutuk 116 ne’ebé oras ne’e hala’o servisu iha STAE nasionál no mos munisípiu 13 inklui RAEOA.

Atu hasoru eleisaun parlamentár 2023, STAE presiza forsa de traballu ida ne’ebé bo’ot, tanba ne’e iha planu STAE nia sei reforsa estrutura ba to’o iha postu administrativu hamutuk 200 hodi bele kompleta númeru ne’ebé presija ho totál 2.675 ne’ebé mak STAE sei rekruta atu bele fó apoiu ba prosesu tomak eleisaun parlamentár nian.

STAE iha orsamentu ne’ebé aprova iha OJE 2023 por volta millaun $10 hodi organiza eleisaun parlamentár ne’e rasik.

STAE halo ona publikasaun ba kalendáriu operasionál eleitorál ne’ebé publika ona iha Jornál da Repúblika no distribui ona mos ba iha entidade tomak iha país ne’e nian, hanesa korpu diplomátiku sira, partidu polítiku sira, ba F-FDTL no PNTL, autoridade munisipál too ba iha autoridade lokál sira no entidade hotu.

Oras ne’e aktividade operasionál STAE nian lao hela iha teritóriu nasionál, no aktividade importante ne’ebé STAE halo mak resensiamentu eleitorál no aktualizasaun baze de dadus ne’ebé mak númeru provizoriu STAE fo sai ona iha dezembru no eleitores ne’ebé mak rejistadu por volta 878.675 no prosesu resensiamentu sei kontinua hela iha postu 65 no sei termina iha loron 30 fulan marsu tinan ne’e.

Atu fo mos oportunidade ba Timoroan sira iha rai liur, ekipa konjunta husi STAE, CNE no MNEK desloka ona ba iha diaspora liu-liu ba nasaun sira hanesan Austrália, Portugal, Englatera, Korea do Súl para halo resensiamentu no aktualizasaun baze de dadus iha Diáspora.

Prezidente CNE, José Agustinho Belo hateten órgaun eleitorál STAE no CNE sempre iha servisu mutua, no iha objetivu ne’ebé importante mak oinsa eleisaun parlamentár 2023 bele la’o ho di’ak.

Jornalista: Vito Salvadór