Hatutan.com, (01 Marsu 2023), Díli—Prezidente Repúblika (PR), José Ramos-Horta enkoraza Empreza Timor Resource atu kontinua halo servisu perfurasaun ba mina-matan sira iha Suai, tanba ne’e lori vantajen ekonómiku ba Timor-Leste (TL).

Country Diretór Timor Resource, Filomeno de Andrade ho ekipa ko’alia bá média hafoin hasoru-malu ho Prezidente Repúblika, José Ramos-Horta iha Palásiu Prezidensiál Nicolau Lobato Bairru-Pité, Kuarta (01/03/2023). Foto/Média PR.

“Xefe Estadu fó sujestaun atu Timor Resource kontinua halo esforsu hodi hakat ba oin bele atinji objetivu perfurasaun mina matan sira ne’ebé oras-ne’e Timor Resource halo hela,” Country Diretór Timor Resource, Filomeno de Andrade hateten hafoin hasoru-malu ho Prezidente Repúblika, José Ramos-Horta iha Palásiu Prezidensiál Nicolau Lobato Bairru-Pité, Kuarta (01/03/2023).

Lee Mós: Perfurasaun Timor Resource iha Suai Hatudu Sinál Pozitivu

Durante enkontru, Prezidente Repúblika José Ramos-Horta mós rona Timor Resource ho parseiru Timor Gap nia preokupasaun no fó opiniaun oinsá atu kontinua hala’o servisu perfurasaun ba mina matan sira iha Suai ba oin.

Oras ne’e daudaun Timor Resource hala’o hela perfurasaun iha mina-matan tolu ne’ebé iha rezultadu no atinje ona metru 3100.

Informasaun ne’ebé hetan ne’e atu fó korajen maka’as, hodi remata perfurasaun ne’ebé Timor Resource planeia atu atinje metru 3500.

Mina matan tolu ne’ebé halo daudaun perfurasaun iha Suai ne’e, ida iha Matai, ida iha Kamanasa no seluk iha Labarai.

“Ida ikus liu kle’an tebtebes ne’e mak iha Labarai ho metru 3500, maibé agora ami to’o ona metru 3100 no sei kontinua halo perfurasaun to’o atinje metru 3500 hodi  hala’o teste ba mina matan ne’e ninia kapasidade,” nia haktuir.

Timor Resource haksolok tebes ho rezultadu ne’ebé mak hetan, maibé informasaun ikus hosi kuantidade ne’ebé iha, sei hato’o ba Autoridade Nasionál Petróleu no Minerais (ANPM) atu bele divulga informasaun ba públiku tuir Prosedimentu legál ne’ebé iha.

Jornalista: Vito Salvadór