Hatutan.com, (16 Marsu 2023), Díli—Embaixadór Austrália iha Timor-Leste, Bill Costelo informa bá Prezidente Repúblika, José Ramos-Horta kona-bá progressu konstrusaun Portu Navál Hera ne’ebé iha hela difikuldade enjeñaria no jeolojia no sei halo revizaun iha tempu badak.

Embaixadór Austrália iha Timor-Leste, Bill Costelo.

“Ami deskobre katak iha difikuldade enjeñaria no tékniku iha portu Hera. Tanba ne’e, iha prosesu konsultasaun ida ho Ministériu Defeza Timor-Leste no F-FDTL atu konsidera dalan ne’ebé di’ak liu ba oin, tanba planu orijinál hasoru difikuldade iha rai no jeolojia,” Bill Costelo hateten, hafoin hasoru malu ho Prezidente Repúblika José Ramos-Horta iha Palásiu Prezidensiál Nicolau Lobato Bairru-Pité, Kinta (16/03/2023).

Lee Mós: Orgullu ho Dezenvolvimentu Komponente Navál

Bill Costelo mós relata ba Prezidente Repúblika katak, Parte F-FDTL no sira seluk vizita ona fatin konstrusaun nian no haree direta progressu ne’ebé atrazu oitoan, maibé Austrália iha kompromissu sei kontinua kontaktu ho ekipa atu bele finaliza.

Austrália mós sei entrega ró patrulla klase-protetór rua ba Timor-Leste no faze inísiu konstrusaun nian la’o hela.

Bill Costelo hamutuk ho Enkarregadu EUA nian inklui adidu Defeza mai halo mós breafing ho Prezidente Repúblika liga ho anúnsiu importante mai hosi Prezidente Estadus Unidus Amérika, Primeiru-Ministru Austrália no Primeiru-Ministru Reinu Unidu nian, kona-bá kooperasaun iha futuru bá dezenvolvimentu kapasidade Austrália atu kaer armas konvensionalmente.

Jornalista: Vito Salvadór