Hatutan.com, (18 Marsu 2023), Jakarta— Aviaun komersiál ho marka Airbus A320, nu’udár aviaun Timor oan nian oras-ne’e preparadu iha aeroportu internasionál Soekarno Hatta, Cenkareng, Jakarta, Indonezia atu realiza voo dahuluk bá Aeroportu Internasionál Prezidente Nicolau Lobato, Dili  ho Bandeira Repúblika Demokrátika Timor Leste nian iha Segunda 20 Marsu tinan ne’e.

Aviaun komersiál ho marka Airbus A320, preparadu iha aeroportu internasionál Soekarno Hatta, Cenkareng Jakarta atu realiza voo dahuluk bá Aeroportu Internasionál Prezidente Nicolau Lobato ho Bandeira RDTL nian iha Segunda 20 fulan Marsu tinan ne’e. Foto/Cipriano Colo

Pilotu ne’ebé oras-ne’e preparadu atu lori aviaun ne’e ho naran Kapitaun Adnan Baang hanesan mós diretór operasaun Aero Díli hateten, oras-nee daudaun iha hela fatin preparasaun tékniku iha Aeroportu Internasionál Soekarno Hatta, Cengkareng Jakarta, Indonezia atu haree aviaun ne’e ninia finalizasaun ba pinta.

Lee Mós: Grande Lansamentu, Governu Orgullu ho Timor Oan Iha Aviaun Rasik

Kapitaun Adnan Baang agradese ba Maromak tanba konsege semo ona hosi Bangkok Tailándia mai Jakarta ho kondisaun seguru no laiha fallansu ruma.

Kona-ba preprasaun atu semo ba Díli Kapitaun Adnan Baang  dehan, buat hotu-hotu preparadu liuliu kona-bá pilotu, parte tékniku no mós ekipa cabin nian.

“Esprera iha voo inísiu ne’e laiha fallansu ruma no buat hotu la’o ho di’ak no sussesu,” Kapitaun Adnan Baang hateten iha Aeroportu Internasionál Suekarno Hatta Cengkareng Jakarta, Indonezia, Sábadu (18/03/2023).

Iha preparasaun sira, ekipa hosi pilotu ne’ebé preparadu hamutuk na’in-haat ho sira nia esperiénsia durante tinan barak nia laran, no sira semo ona kuaze liu oras 10.000.

Kona-bá ekipa cabin nian mós iha ema na’in-haat iha Jakarta, tanba ekipa sira seluk preparadu iha Timor Leste atu bele simu aviaun ne’e iha Aeroportu Internasional Prezidente Nicolau Lobato Comoro, Díli, alende ne’e ekipa tékniku mós prepara ema na’in-rua.

“Ko’alia kona-bá esperieinsia, ha’u onestu katak, ha’u sai ona pilotu desde tinan 1996 to’o ohin loron no konsege semo ona to’o oras liu 13.000,” Kapitaun Adnan Baang hateten. 

Kapitaun Adnan Baang hanesan pilotu bá aviaun komersiál ho marka Airbus A320. Foto/dok. Adnan Baang.

Kapitaun Adnan Baang  mós serbisu ona iha Airline oioin iha Indonézia no mós iha estranjeiru ne’ebé ikus liu semo iha Vietname ho Kambódia.

“Ha’u haree ida-ne’e hanesan oportunidade ida no hanesan mós obstákulu ida mai ha’u iha ha’u nia tempu ikus nian hanesan ema pilotu ida. Ha’u hakarak atu dezenvolve siénsia hodi fahe espesialmente bá Timor oan sira ne’ebé iha oportunidade hakarak atu sai hanesan pilotu, cabin crew no tékniku, ita fó oportunidade,” nia hateten tán.

Nune’e mós tékniku, enjeñeru Nova Satriawan ne’ebé iha esperiénsia serbisu iha Airlines nian desde tinan 2010 esplika, aviaun Airbus A320 ho nia kapasidade atu tula passajeiru hamtuk ema na’in 162.

Parte aviaun ne’e rasik, iha kotuk liu iha parte emerjénsia nian ho odamatan haat, rua iha parte karuk  no rua iha parte loos nian, bainhira mosu situasaun emrejénsia ruma bele loke.  

Nune’e mós enjeñeru Bay Setiadi esplika oitoan kona-bá preparasaun tékniku di’ak loos ona no halo de’it ona finalizasaun iha pinta.  

Kona-bá logo no mós Bandeira prontu ona no espera iha Segunda loron 20 fulan Marsu bele tun ona iha Timor Leste.

“Ita iha kustume hosi parte tékniku nian, sempre halo preparasaun tékniku molok ita semo. Bainhira atu semo, ita sempre halo kontrolu ba sistema tomak aviaun nian bainhira laiha ona fallansu ruma mak semo no jeralmente preparasaun tékniku ba primeiru voo ne’e laiha problema. Tanba iha regulamentu sira hateten katak, bainhira aviaun ida seidauk preparadu, ne’e labele semo no ida ne’e labele halimar tanba ko’alia kona-bá seguransa. Tanba ne’e, ekipa tékniku garante katak Airbus A320 ninia kondisaun preparadu atu semo,” nia esplika.

Aviaun komersiál ho marka Airbus A320 ne’e, ninia na’in-loloos maka emprezariu Timoroan ho naran Lourenço de Oliveira, hanesan na’in ba empreza Aero Díli nian.

 Enjeñeru Bay Setiadi (karuk) ho Enjeñeru Nova Satriawan (loos) hanesan tékniku bá aviaun komersiál ho marka Airbus A320. Foto/Cipriano Colo.

Aviaun ne’e prodús ka fabrika hosi Aérobus iha nasaun Europa ho kustu millaun $100-resin.

Grande Lansamentu Aero Díli A320, realiza ona iha Otél Timor iha Segunda loron 23 fulan Janeiru tinan 2023, ne’ebé partisipa hosi Primeiru Ministru Taur Matan Ruak.

Iha Kuarta loron fulan Marsu tinan ne’e, aviaun Airbus A320 Aero Díli nian halo test flight iha  Aeroportu Internasionál Suvernabhumi, Bangkok-Tailándia.

Aviaun komersiál Aero Díli sei hala’o nia rute operasaun entre Dili-Denpasar, Dili-Surabaya, Dili-Austrália, Dili-Singapura, Dili-Filipina, Dili-Xina.

Empreza Aero Dili kontrata instrutór na’in-tolu hosi Korea Súl, Europa no mós Indonézia, Aero mossa (pramugari) inklui mekániku sira ne’ebé iha kualifikasaun di’ak ho esperiénsia servisu di’ak no iha pilotu balun ne’ebé iha esperiénsia servisu tinan 18 iha área aviasaun.

Jornalista: Cipriano Colo