Hatutan.com, (20 Marsu 2023), Díli—Aviaun Komersiál Timor Oan nian ho marka Airbus A320 tun ona iha iha Aeroportu Internasionál Prezidente Nicolau Lobato, Comoro, Díli iha tuku 8:45 Oras Timor Leste nian, halo Ministru Transporte no Komunikasaun (MTK), José Agostinho da Silva hamonu matan-been orgullu nian tanba primeiravez iha istória aviaun ida semo ho Bandeira Repúblika Demokrátika Timor Leste nian.

Aviaun Komersiál Timor Oan nian ho marka Airbus A320 tun ona iha iha Aeroportu Internasionál Prezidente Nicolau Lobato, Comoro, Díli, Segunda (20/03/2023). Foto/Elio dos Santos da Costa.

Ministru José Agostinho hamonu matan-been iha aviaun laran tanba akompaña direta voo dahuluk aviaun Timor Oan nian ne’e hosi Aeroportu Internasionál Prezidente Soekarno Hatta, Cenkareng, Jakarta, ne’ebé semo iha tuku 05 resin madrugada oras Jakarta nian.

Lee Mós: Aviaun Timor Oan Nian Prontu Ona Atu Semo Bá Díli

Hafoin tun hosi aviaun ne’e, José Agostinho mós hato’o diskursu iha serimónia lansamentu voo dahuluk ne’e katak, ohin ne’e hanesan loron espesiál ida no momentu kmanek tebes ba empreza Aero Díli nian, hanesan seitór privadu nasionál ho korazen nobarani koopera ho empreza estranjeiru sira hodi list ba aviaun air bus A320 ho naran Aero Díli.

Advertisement

“Dader kmanek ida ne’e aviaun Aero Díli tun iha aeroportu internasionál Nicolau Lobato, ne’e hatudu katak seitór privadu iha Timor-Leste bele kompete ho air lines sira ne’ebé mai hosi rai liur durante ne’e hodi fasilita Timoroan sira liu hosi meius transportes Aero,” José Agostinho da Silva hateten.

Governu liu hosi Ministériu Transporte no Telekomunikasaun fó oportunidade ba empreza Aero sira hosi seitór privadu atu kompete iha área ida-ne’e ka seitór aviasaun hodi aumenta tán Timor-Leste nia konetividade Aero hodi fasilita no lori Timoroan sira ba estranjeiru no hosi estranjeiru mai Timor Leste.

Prezidente Repúblika, José Ramos-Horta, hala’o lansamentu voo dahuluk bá aviaun Komersiál Timor Oan nian ho marka Airbus A320 tun ona iha iha Aeroportu Internasionál Prezidente Nicolau Lobato, Comoro, Díli, Segunda (20/03/2023). Foto/Elio dos Santos da Costa.

Aeroporto internasionál Nicolau Lobato nu’udár odamatan boot ba konektividade Aero, ne’e duni governu fó oportunidade ba seitór privadu sira atu kompete iha seitór aero hodi hamoris no dudu seitór turizmu.

Dezenvolvimentu Aeroportu internasionál Nicolau Lobato daudaun ne’e iha hela prosesu nia laran atu halo tán estensaun ba pista ne’ebé oras-ne’e iha de’it 1900,5 metrus no atu estende ba 2.1 Kilometru no ba faze segundu ba 2.5 kilometru, ikus liu ba 3000 metru ka 3.0 kilometru.

Konstrusaun ba terminál pasajerus, konstrusaun ba fasilidade karantina, fasilidades imigarasaun tuir rekizitu no padraun internasionál tuir rekizitu hosi organizasaun Aviasaun Sivíl Mundiál ka Internasionál Civil Aviation Organization (ICAO) ninian.

Ne’e dunik ho melloramentu ne’ebé sei halo ba Aeroportu internasionál Nicolau Lobato solisita ba operadór aviaun sira atu kumpri nafatin rekizitu sira ne’ebé aviasaun sivíl Mundiál iha.

Advertisement

Bainhira Timor-Leste partisipa iha konferénsia internasionál organizasaun Aviasaun Sivíl Mundiál iha sidade Montereal, Canada nian, Sekretáriu Jerál ICAO louva tebes progresu Aviasaun Sivíl Timor-Leste nian ne’ebé VIII governu konstituisionál nia mandatu liu hosi ANNATL bele prienxe rekizitu mínimu balun ne’ebé ICAO iha, no antes ne’e Timor-Leste iha de’it pursentu 46 maibé konsege prienxe rekizitu mínimu ICAO nian ho valor pursentu 64.

“Esforsu tomak ne’ebé ita halo konsege ultrapassa rekizitu mínimu ne’ebé ICAO iha no espera katak ho susesu ida ne’e ba futuru ita bele dudu dezenvolvimentu iha seitór turizmu. Ha’u hakarak fó parabéns ba empreza Aero Díli, ho nia parseiru no ekipa tomak ne’ebé atu haburas no hala’o melloramentu ba seitór konetividade Aero. Ita hotu hein katak kompañia aero seluk sei hakarak hatudu interesse atu investe no kompete iha konetividade Aero ida-ne’e,” Ministru ne’e fó parabens.

Pilotu ne’ebé lori aviaun Komersiál Timor Oan nian ho marka Airbus A320, Kapitaun Adnan Baang. Foto/Hatutan.com.

Pilotu ne’ebé lori aviaun Airbus A320, Adnan Baang mós sente kontente tanba Timor Leste bele iha ona aviaun rasik no semo ho Bandeira RDTL.

“Ha’u asiste direta Ministru hamonu matan-been orgullu nian bainhira ita tuun iha Aeroportu. Ha’u mós sente orgullu ho Timor Oan sira tanba iha ona aviaun rasik ne’ebé semo ho nia Bandeira rasik. Ministru ohin hamonu matan been ne’e tanba orgullu loos no ha’u hato’o de’it parabens ba nia iha aviaun laran,” Adnan Baang hateten ba Hatutan.com iha aeroportu Comoro.

Aviaun ne’e rasik semo primeiru hosi Aeroportu Internasionál Soekarno Hatta mai Aeroportu Comoro tula totál ema 28 inklui Ministru Transporte no Komunikasaun, José Agostinho da Silva, ekipa pilotu, ekipa Conselho de Administração da Autoridade da Aviação Civil de Timor-Leste, ekipa Aero mossa, ekipa hosi MTK no jornalista na’in tolu.

Aviaun ne’e sosa hosi emprezáriu Timoroan ho naran Lourenço de Oliveira, nu’udár na’in ba empreza Aero Díli.

Advertisement

Jornalista: Cipriano Colo