Hatutan.com, (20 Marsu 2023), Díli—Prezidente Repúblika (PR), José Ramos-Horta husu Embaixadór foun Timor-Leste ba Reinu Unidu, João Paulo da Costa Rangel atu kontinua tau atensaun ba kooperasaun bilaterál país rua no fó atensaun másimu bá traballadór Timoroan sira iha Reinu Unidu ho passaporte Portugál.

Prezidente Repúblika (PR), José Ramos-Horta fó posse bá Embaixadór foun Timor-Leste bá Reinu Unidu, João Paulo da Costa Rangel, iha Palásiu Prezidensiál Nicolau Lobato, Bairru-Pité, Segunda (20/03/2023). Foto/Média PR.

Ministra Negósiu Estranjeiru no Kooperasaun (MNEK), Adaljiza Magno hateten iha semana balun João Paulo da Costa Rangel  sei bá Reinu Unidu hodi assume kna’ar hanesan Embaixadór foun.

Lee Mós: Xina Komprometidu Hametin Relasaun Bilaterál ho Timor-Leste

Reinu Unidu hanesan país ida importante ba Timor-Leste, liu-liu parte konsolares, tanba Timoroan barak tebe-tebes mak hela iha Reinu Unidu hodi servisu.

Reinu Unidu mós hanesan país ida ne’ebé iha influénsia iha mundu, país riku no Timor-Leste iha relasaun istórika lubuk ida ho rai ne’e, entaun Adaljiza Magno sente obrigadu atu mantein relasaun di’ak ho Reinu Unidu.

“Xefe Estadu fó posse ba Embaixadór foun, Prezidente Repúblika no ita hotu hein katak nia bele halo ninia kna’ar ne’ebé ita hotu-hotu hakarak liu-liu ba protesaun traballadór Timoroan sira iha Inglatera,” Adaljiza Magno hateten iha Palásiu Prezidensiál Nicolau Lobato, Bairru-Pité, Segunda (20/03/2023).

Ramos-Horta nia mensajen importante ba embaixadór foun maka Reinu Unidu hanesan país ida ne’ebé importante ba Timor-Leste, país ida ne’ebé traballadór Timoroan barak iha ne’ebá buka moris.

Alende sira hela iha Inglatera, sira kontribui ba ekonómia rai ne’eba nian, no mós kontribui hotu ba ekonómia Timor-Leste nian.

“Ne’e duni importante tebe-tebes atu mantein lasu amizade ne’ebé iha ona no hanesan reprezenta Estadu Timor-Leste tau matan ba Timoroan sira ne’ebé servisu iha Reinu Unidu,” Ministra ne’e haklaken mensajen Xefe Estadu.

Embaixadór foun Timor-Leste ba Reinu Unidu, João Paulo da Costa Rangel promete sei fó prióridade iha Inglatera maka mantein relasaun bilaterál no ida-ne’e importante tebes.

Timor-Leste rekoñese Reinu Unidu hanesan país amigu, politikamente, diplomatikamente relasaun Timor-Leste ho Reinu Unidu importante tebe-tebes, iha mós relasaun entre povu importante, neste momentu maluk traballadór Timoroan barak ne’ebé bolu Inglatera hanesan sira nia uma fatin ne’ebé sira moris, hala’o servisu.

“Relasaun Timor-Leste ho Reinu Unidu buat ne’ebé halo ajuda tebes ita nia nasaun no ita nia povu. Tanba ne’e relasaun ida ne’ebé importante, protesaun konsolár ba ita nia sidadaun sira iha Inglatera sei haree iha tempu badak servisu hamutuk ho lideransa MNEK atu haree ida ne’e oinsá servisu besik liu ba ita nia komunidade tanba sira realmente ita nia erói, ba sira nia ita profundu agradesimentu,” Embaixadór João Paulo da Costa Rangel hateten.

Buat importante ne’ebé sei halo iha Reinu Unidu maka tenke asegura protesaun konsular ba Timoroan sira  no sei konsulta mós ho líder másimu iha ministériu atu simu orientasaun, sei aprezenta proposta ida, rua ba MNEK atu estuda hamutuk depois rona diretiva hosi MNEK.

Prinsipalmente servisu konsulár sira ne’ebé bele presta iha Reinu Unidu sei lori ba to’o iha ne’eba atu fasilita Timoroan sira nia vida ho di’ak, trata sira forma digna, respeitu tanba sira merese estadu nia domin, estadu nia atensaun tanba buat ne’e sira halo hodi tulun dezenvolvimentu ekonómia família nian iha Timor-Leste tanba ne’e mak ba sira ita sei fó atensaun.

Normalmente, embaixadór hotu-hotu nia Mandatu tinan tolu maibé depende nesesidade, depende sirkunstánsia bele estende.

Jornalista: Vito Salvadór