Hatutan.com, (27 Marsu 2023), Díli- Comissão Nasionál das Eleições (CNE) sei organiza semináriu nasionál hodi fasilita partidu polítiku (ParPol) bele hato’o sira -ia vizaun polítika no programa iha kampaña eleisaun parlamentár (Elpar) 2023.

Lee Mós : Prezidente Repúblika Husu STAE-CNE Profisionál no Labele Monu Bá Manipulasaun Polítika

Prezidente CNE, José Agustinho Belo ho nia ekipa. Foto/Mídia GPR

Semináriu nasionál ne’e halo ho objetivu atu garante pás no estabilidade durante kampaña eleisaun parlamentár no Timor-Leste rasik adopta ona dokumentu Fraternidade Umana tamba ne’e kaer ba valores no prinsípiu sira iha dokumentu ne’e no atu hametin demokrásia iha povu nia moris hakmatek, CNE sei realiza semináriu nasionál ba partidu politiku hotu ne’ebé sei kompete iha eleisaun parlamentár 2023.

Prezidente CNE, José Agustinho Belo, hateten atu eleisaun parlamentár 2023 lao ho hakmatek no susesu, CNE prepara hela atu realiza konferénsia nasionál ida no sei konvida ParPol, sosiedade sira hotu, intelektuál ho parte sira-ne’ebé importante iha rai ida-ne’e atu hola parte hodi hato’o bá malu, fó hanoin bá malu kona-bá prosesu festa demokrásia ne’ebé povu sei enfrenta.

Refere bá prinsípiu no valor sira ne’ebé hatuur iha Konstituisaun, CNE ho nia ekipa, Segunda (27/3/2023), halo audiénsia ho Prezidente Repúblika hodi hato’o hela kona-ba servisu balun ne’ebé CNE hala’o liuliu kona-bá komisáriu sira-nia supervizaun iha rai-li’ur, kona-bá rejistu bá sidadaun sira.

Hato’o mós ba Xefe Estadu katak kampaña fulan oin sei komesa, atu garantia kampaña ida la’o di’ak, eleisaun ida di’ak, formas hotu-hotu CNE sei uza, tanba ne’e mak CNE oras ne’e dadauk prepara hela konferénsia nasionál ida.

Xefe Estadu entuziásmu tebes no sei partisipa iha konferénsia nasionál ne’ebé sei hala’o iha loron 12 fulan-Abríl 2023.

Konferénsia ne’e sei ko’alia kona-ba futuru nasaun ne’e nian. Ema hotu bolu malu hanesan família, maun-alin tenki konkretiza iha eleisaun ne’ebé pasífika.

Iha konferénsia nasionál ne’e, CNE sei fasilita mos atu partidu politiku sira bele hahu ko’alia bá povu sira nia vizaun politika, sira nia programa atu eleitor sira informadu ho partidu polítiku sira nian programa no bele desidi liu husi votasaun ne’ebé sei hala’o iha loron 21 fulan-Maiu 2023.

Jornalista: Vito Salvadór