Hatutan.com, ( 05 Maiu 2023), Díli—Partidu Demokrátiku hanesan partidu ne’ebé halibur otas foun sira iha kampaña polítika bá eleisaun parlamentár 2023 hatuur programa prioridade mak promove diálogu, promove konsensu nasionál, promove konsentrasaun polítika hodi halibur lider partidu polítika hotu haree bá interese nasionál no povu nia interese.

Lee Mós : PD Ukun Hakarak Fó Kréditu Bá Estudante Sira no Hasa’e Saláriu Mínimu bá $200.00

Adriano do Nascimento “Loro Mau”. Foto/Média PD

Liuhosi kampaña aberta iha Luak, Munisípiu Manufahi, Sesta (05/05/2023), Prezidente Komisaun Polítika Nasional (CPN) Partidu Demokrátiku (PD), Adriano do Nascimento “Loro Mau” hatutan lia-fuan matenek na’in balu nian hodi dehan, matenek halo ema fasil atu hana’i malu, maibé susar atu hanehan malu, matenek halo fasil atu ukun malu, maibé susar atu sai atan bá malu  no ida-ne’e tuir Adriano do Nascimento katak Don Boaventura halo Saudozu Franicsco  Xavier do Amaral halo atu ema labele hanehan Timoroan no atu labele sai atan bá ema.

Nia hateten, ohin PD hatutan no fó kontinuidade ho programa polítika hodi haklaken konseitu polítika nian ne’ebé hatuur iha programa sira,  sei halo dezenvolvimentu polítika ka dezenvolvimentu institusionál hanesan aliserse bá programa prioridade partidu nian.

“Durante tinan-20 nia laran, ita restaura ita-nia ukun rasik an, ita nia aman no lider polítiku sira han-malu, hirus-malu, ódiu-malu, satan-malu no hatuun-malu, tanba ida-ne’e mak hamonu Governasaun iha instabilidade nia laran, hatuur nasaun iha frajilidade nia laran,” Adriano do Nascimento “Loro Mau” hateten.

Ho nune’e, Adriano “Loro Mau” tenik, PD nia programa prioridade mak promove diálogu, promove konsensu nasionál, promove konsentrasaun polítika atu halibur Timoroan hotu hanesan Don Boaventura halibur liurai no povu hotu hodi konsentra iha Manufahi hodi hatuur lia-loos no justisa iha nasaun.

Sita hosi komunikadu imprensa ne’ebé Hatutan.com asesu, Adriano do Nascimento “Loro Mau” haktuir tan, PD sei halibur lider polítiku sira hotu atu hamriik iha PD nia sorin tanba PD nu’udár jerasaun foun sira nian hodi hatuur lia-loos no justisa atu fó kontinuasaun, halo konstrusaun Estadu no dezenvolvimentu nasionál.

PD nia programa hodi atu polítika bá dezenvolvimentu institusionál. Nune’e liuhosi polítika ida ne’e sei fortaleza órgaun soberania haat, prezidénsia repúblika, parlamentu nasionál, Governu no Tribunal.

Segundu programa prioridade polítika PD nian, Adriano do Nascimento hateten, hakarak dezenvolve  ekonomia iha nasaun, tanba ukun an tinan barak ona barak mak sei moris kiak, barak mak laiha servisu, kbiit atu sosa sasán laiha, reseita Estadu menus, reseita petrolífera hahú menus, reseita la’ós petrolífera selu saláriu la to’o tanba ne’e PD sei halo akordu ho Governu Austrália ho kompañia mina no gás atu dezenvolve gás iha kampu Greater Sunrise hafoin dada kadoras mai Timor-Leste.

Sei fó mós kontinuasaun bá obra polítiku  PD no CNRT nian hanaran projetu tasi-mane ne’ebé sei harii refinaria iha Manufahi, harii supply base iha Suai no iha Beaço-Viqueque.

PD mós kompromete halo estrada hosi suku bá postu hosi postu ba munisípiu no munisípiu bá kapitál tuir lema PD nian katak “harii nasaun hosi baze”.

PD iha programa mós atu harii indústria ikan nian bá an rasik, nune’e bele kontrola rasik ikan iha nasaun ida ne’e hodi bele fó servisu bá Timoroan sira.

PD sei halo dezenvolvimentu sosiál no kulturál, tanba durante ukun an seidauk hatuur no dignifika loloos funu na’in sira, seidauk dignifika inan-aman, ferik-katuas no seidauk dignifika an rasik nu’udár rai Timor ida ne’e ninain, tanba barak sei ba servisu iha rai-li’ur no barak sosa sasán labele.

PD tau mós prioridade ba Edukasaun hodi harii infraestrutura no fasilidade Edukasaun nian, harii biblioteka, muzeu no hari sentru peskiza sívika nune’e mós oferese kréditu bá estudante sira ne’ebé halo hotu ona sira-nia estudu iha sekundária bá iha  ensinu superior no foti lisensiatura.

PD sei hadi’a dezenvolvimentu infraestrutura, liu-liu estrada la di’ak, eletrisidade fatin balun seidauk lakan, komunikasaun karun, balun laiha rede, nune’e PD sei kontinua halo no hadi’a bainhira povu fó fiar atu ukun iha Governasaun da-IX períodu 2023-2028.

Jornalista : Elio dos Santos da Costa