Hatutan.com, (24 Maiu 2023), Díli- Prezidente Partidu Demokrátiku (PD), Mariano Assanami Sabino Lopes  agradese  konfiansa hosi povu bá PD hodi kontinua luta bá dignifika no valoriza povu bá moris diak tuir prinsípiu sira ne’ebé konsagra iha Konstituisaun Republika Demokratika Timor-Leste (K-RDTL).

Lee Mós : PD Hakarak Konsensu Nasionál no Halibur Lider Partidu Polítiku Sira

Rezultadu kontajen final provizóriu hosi  Sekretariadu Tékniku Administrasaun Eleitorál (STAE) hatudu katak  Partidu Demokrátiku (PD) hetan votu 64,493 ekivale ba pursentu 9,32 no provizoriamente hetan kadeira neen (6) no sai hanesan partidu polítiku terseiru mais votadu iha eleisaun Parlamentár 2023.

Prezidente Partidu Demokrátiku (PD), Mariano “Assanami” Sabino Lopes. Foto/Dok.Hatutan.com

Mariano Assanami Sabino Lopes liuhosi konferénsia ba imprensa ne’ebé halao iha sede nasionál PD, Kolmera, Díli, Kuarta (24/05/2023) hateten, konfiansa ne’ebé povu fó bá Partidu Demokrátiku iha eleisaun parlamentár sei uza ho didi’ak atu servi inan-aman sira ho diak, no servi rai ne’e ho di’ak liután bá oin.

Ho votus ne’ebé ki’ik, komprimisiu polítiku hotu-hotu ne’ebé Partidu Demokrátiku iha sei labele realiza hotu, maibé sei halo esforsu atu komprimisu lubuk ida tenke atinje bá povu nia moris di’ak.

“Ita hotu iha kampaña ko’alia oinsa atu hamenus dezempregu iha Timor-Leste, oinsa atu dignifika inan-aman no joven sira iha rai-laran no mós joven sira ne’ebé servisu iha rai-li’ur, rezolve bee-moos ba povu, tamba ne’e PD iha esperansa katak bainhira halo koligasaun sei deskute kle’an kona-bá plataforma liu-liu programa sira para bele servi povu di’ak liu,” Mariano Assanami Sabino Lopes hateten.

PD hanesan partidu polítiku ida ne’ebé nakloke sempre halo komunikasaun ho partidu sira hotu-hotu, no kontaktu hanesan baibain, maibé PD respeita bá kontajen ne’ebé seidauk remata tamba seidauk hetan lejitimidade husi Tribunál.

Konferénsia imprensa PD, Kuarta (24/5/2023). Foto/Elio dos Santos da Costa

PD nafatin hein no partidu sira ne’ebé votu barak liu mak sempre halo diálogu ho partidu sira ne’ebé hetan votus natoon. PD kontínua hakmatek hodi hein no nafatin respeita bá prosesu kontajen sira ne’ebé lao hela to’o apuramentu nasionál no bá hetan validasaun hosi Tribunál Rekursu.

“Partidu Demokrátiku nafatin ho kompromisu  katak hotu-hotu hamutuk mak partisipa iha eleisaun tamba ne’e vitória ne’e vitória povu nian, no hakarak dedika vitória ida-ne’e bá moris di’ak povu nian,” Nia subliña.

Iha biban ne’e mós lideransa masímu Partidu Demokrátiku ne’e agradese bá povu tomak, militante no simpatizante, apoiantes no movimentu Partidu Demokrátiku hotu, bá líder konfisoins relijiozu sira ne’ebé fó apoiu ba PD liuhosi orasaun no ema hotu ne’ebé halo esforsu makas, servisu to’o ikus mai PD atinze nia objetivu polítiku hodi hetan votu konfiansa hosi povu.

Jornalista: Vito Salvadór