Hatutan.com, (30 Maiu 2023), Díli-Comissão Nacional de Eleições (CNE) sei submete rezultadu provizóriu apuramentu nasionál bá Tribunál Rekursu (TR) iha loron 01 fulan-Juñu 2023 hodi halo validasaun.

Lee Mós : CNE Konklui Apuramentu Nasionál, Sei Submete Keixa Haat Bá Ministériu Públiku

CNE sei enkamiña rezultadu provizóriu ne’e tanba iha Domingu (28/05), konklui ona prosesu apuramentu nasionál durante oras 72 nia laran.

Prezidente CNE, José Agostinho Belo, prezide konferénsia imprensa, Tersa (30/05/2023). Foto/Elio dos Santos da Costa

Haktuir bá deliberasaun númeru 4/V/CNE/2023, kona-bá aprovasaun rezultadu provizóriu Eleisaun Parlamentu Nasionál 2023, konforme artigu 48, númeru 9/2017, 5 Maiu, alterasaun da-haat bá Lei númeru 6/2006, 28 fulan-Dezembru, Lei Eleitorál bá Parlamentu Nasionál ne’ebé atribui kompeténsia bá CNE hodi halo apuramentu nasionál iha prazu oras 72 hodi elabora akta no afiksa rezultadu provizóriu iha sede apuramentu nasionál.

Hafoin termina tiha apuramentu nasionál, CNE liuhosi nia Plenáriu Extraodináriu ho unanimidade delibera no aprova akta rezultadu provizóriu bá Eleisaun Parlamentu Nasionál 2023, hodi afiksa no submete bá Supremu Tribunál Justisa nian (STJ).   

Prezidente CNE, José Agostinho Belo, liuhosi konferénsia imprensa, Tersa (30/05),  afirma, órgaun ida importante fó sai rezultadu provizóriu maka CNE. Maibé, sei iha tán tempu oras 48, sura hosi ohin (30/05) to’o bainrua (01/06) atu partidu sira sente iha reklamasaun ruma, ka iha kestaun ruma ne’ebé sira atu halo rekorre.

“Ohin fó sai, 48 oras laiha, bainrua lokraik, sasán bá ona Tribunál  Rekursu. Tanba ultima instánsia ne’ebé atu halo validasaun bá prosesu tomak ne’e iha tribunál. Maibé, dala-hira ona ita eleisaun, bá Tribunál bele to’o oras 72 bele mós la to’o, kuandu prosesu hotu limpu, la’o di’ak, klaru, no sei fó sai iha tempu ne’ebé mak determinadu,” Prezidente CNE, José Belo hateten durante fó sai rezultadu provizóriu apuramentu nasionál iha Salaun Laline Larigutu, Caicoli-Díli.

José Belo dehan, maske lei fó hatete sei iha tempu oras 48 bá partidu polítiku sira atu hato’o sira-ninia kontestasaun ruma, maibé, la’ós mós atu kuadru no líderansa partidu polítiku sira hakarak hato’o keixa.

“Sé iha keixa, tenke ho fundamentu, aprezenta buat ne’ebé di’ak, maibé, primeiru tenke fiar bá orgaun eleitorál CNE ho STAE, tanba órgaun rua ne’e, hala’o servisu bá partidu polítiku sira hotu. Tanba ParPol sira iha maka, CNE iha. Tanba ne’e maka, lalika hanoin dehan deskonfia malu. Tempu deskonfia malu ne’e liu tiha ona. Luta ne’e ita deskonfia malu maka ita susar ne’e. Sé ita hotu hamutuk rezolve la to’o oras 24 ita-nia sistema dehan Métodu D’hont, ita uza para atu haree rezultadu ida ne’e, sé mak liu barreira, sé mak la liu?. Ne’ebé, laiha ema ida aumenta, laiha ema ida diminui. Sistema automátika,” José Belo fó hanoin.

Reprezentante partidu polítiku sira partisipa iha konférensia imprensa, Tersa (30/5/2023). Foto/Elio dos Santos da Costa

Tuir akta kona-bá rezultadu provizóriu apuramentu nasionál CNE nian bá Eleisaun Parlamentár, 21 Maiu 2023 ho nia rezultadu sira mak hanesan: Totál akta sira ne’ebé apura ona iha 1472 (100,00%).

Totál eleitór sira ne’ebé rejistadu 890.145. Totál eleitór sira ne’ebé partisipa iha eleisaun 705.693, mai hosi feto 343.278 (48,64%), mane 362.415 (51,36%). Taxa partisipasaun 79%. Totál votu sira ne’ebé válidu 692.521 (98,13).

Totál boletin sira ne’ebé abandonadu 26. Totál votu sira ne’ebé Nulu 10.387 (1,47%). Totál votu sira ne’ebé branku 2.698 (0,38%). Totál votu sira ne’ebé reklamadu 0 (0,00%). Totál votu sira ne’ebé rejeitadu 61 (0,01%).

Hosi rezultadu provizóriu apuramentu nasionál ne’e, atribui votu bá kada partidu sira mak hanesan tuir mai ne’e; PDN 597 (0,1%), PLPA 3.272 (0,5%), PLP 40.720 (5,9%), PD 64.517 (9,3%), KHUNTO 52.031 (7,5%), PVT 25.106 (3,6%), UDT 1.256 (0,2%), PUDD 21.647 (3,1%), PR 1.558 (0,2%), UNDERTIM 1.023 (0,1%), FRETILIN 178.338 (25,8%), CNRT 288.289 (41,6%), CASDT 3.170 (0,5%), MLPM 642 (0,1%), PST 2.415 (0,3%), PDC 1.261 (0,2%), no APMT 6.678 (1,0%).

Maske nune’e, partidu neen (6) de’it mak liu barreira 4%, hodi hetan asentu Parlamentár iha Paralementu Nasionál (PN), CNRT 288.289 (kadeira 31), FRETILIN 178.338 (kadeira 19), PD 64.517 (kadeira 6), KHUNTO 52.031 (kadeira 5), no PLP 40.720 (kadeira 4).

Iha akta kona-bá rezultadu provizóriu Eleisaun Parlamentu Nasionál 2023 aprova hosi Prezidente CNE, José Agostinho Belo, Vise Domingos Barreto, Sekretáriu Odete Maria Belo, no Komisáriu sira mak hanesan, Alcino de Araújo Baris, Olávio da Costa Almeida Monteiro, António Gonçalves, ho Carlito Martins.

Jornalista: Rogério Pereira Cárceres