Hatutan.com, (17 Juñu 2023), Díli-Prezidente Repúblika (PR), José Ramos-Horta, Sábadu (17/06/2023), hale’u tuku 14:47 Otl, to’o hikas iha Timor-Leste hafoin bá halo tratamentu saúde iha ospitál Royal Darwin-Austrália.

Lee Mós : Sábadu Aban, Prezidente Repúblika To’o Fali iha Timor-Leste

Xefe Estadu to’o iha Aeroportu Internasionál Prezidente Nicolau dos Reis Lobato ho Aviaun Qantaslink Austrália nian, ho marka VH-XVO.

Prezidente Repúblika hiit-liman ho oin hamnasa bá jornalista sira bainhira to’o fali iha Timor-Leste, Sábadu (17/06/2023). Foto/Rogério Pereira Cárceres

Tuun hosi aviaun Prezidente Repúblika simu direta hosi  dirijente sira no finsionariu Palásiu Prezidensiál nian, inklui Sekretáriu Jerál partidu Congresso Nacional Reconstrucção de Timor-Leste (CNRT), Francisco Kalbuadi Lay, ho kuadru  partidu CNRT balun tan.

Ho oin hamnasa, Xefe Estadu tuun hosi aviaun mai kaer-liman ho emar hirak ne’ebé hein ona no la’o mai liuhosi sala VIP Aeroportu Internasionál Prezidente Nicolau Lobato, Comoro, Díli.

Durante minutu balun, Xefe Estadu tuur deskansa uitoan iha sala VIP no lakleur de’it sai hosi dala VIP mai direta sa’e karreta hodi liubá nia rezidénsia iha Meti-Aut, Díli.

Liu iha jornalista sira nia futar oin, Xefe Estadu ne’ebé ho style taka xapeu no uklu metan, halo kontinénsia no foti-liman bá jornalista sira ho oin hamnasa.

Jornalista sira ne’ebé durante ne’e estakadu iha Palásiu Prezidensiál hodi halo kobertura bá atividade no programa Prezidente Repúblika nian simu informasaun  katak  Xefe Estadu fila hikas mai Timor-Leste. Nune’e, jornalista sira-ne’e bá aeroportu internasionál atu bele foti imajen no filmajen Prezidente Repúblika fila hosi Austrália ho kondisaun saúde ne’ebé di’ak loos. Maibé hetan impedimentu hosi pesoál apontamentu polítika iha Palásiu Prezidensiál nian, Julio Gonçalves, hodi fó orientasaun bandu jornalista sira foti imajen no foti filmajen.

Jornalista sira hosi mídia online Hatutan.com, Timor Post, GMNTV ho Dili Post, labele asesu halo kobertura ho di’ak no la konsege foti imajen ho filmajen sira ho di’ak kona-bá Prezidente Repúblika tuun iha Aeroportu Díli tanba Julio Gonçalves nu’udár pesoál apontamentu polítiku hosi partidu CNRT iha Palásiu Prezidensiál fó orientasaun bandu jornalista sira foti imajen ka foti filmajen.

“Jornalista labele hasai foto, halo gravasaun video, ho razaun katak, Prezidente Repúblika José Ramos-Horta rasik mak haruka,” tenik funsionáriu balun ne’ebé haktuir orientasaun hosi Julio Gonçalves.

Julio Gonçalves nu’udár pesoál apontamentu polítika hosi partidu CNRT iha Palásiu Prezidente iha unidade ida naran Kafé. Unidade ida-ne’e nia knar importante mak hala’o programa reabilitasaun kafé. Tanba ne’e, Julio Gonçalves laiha kompeténsia natoon atu trata servisu protokolu Estadu nian ka laiha kompeténsia atu hala’o servisu relasaun públika nian.

Baibain Prezidente Repúblika halo viajen bá rai-li’ur ka rai-laran no Prezidente Repúblika nia atividade sira iha rai-laran  sempre iha koordenasaun di’ak ho mídia no jornalista sira.

Parte sira kompetente iha Palásiu Prezidensiál sempre iha komunikasaun bá jornalista no mídia sira atu halo kobertura bá Xefe Estadu nia ajenda enkontru, inklui atividade vizita sira iha rai-laran no rai-li’ur. Tanba ne’e, jornalista sira mós duvida ho orientasaun hosi Julio Gonçalves nian hodi lori Prezidente Repúblika nia naran bandu jornalista no mídia sira atu foti  imajen no foti filmajen.

Jornalista sira tenta ona hakarak halo konfirmasaun direita ho  Prezidente Repúblika, José Ramos-Horta, kona-bá informasaun hosi pesoál balun ne’ebé dehan  Julio Gonçalves lori Prezidente Repúblika nia naran husu jornalista sira labele foti imajen no labele foti filmajen.  Maibé, jornalista sira la konsege no laiha biban bá jornalista atu hasoru direta Prezidente José Ramos-Horta iha sala VIP Aeroportu nian tanba jornalista labele asesu tama to’o sala VIP no hein de’it iha li’ur. Nune’e, Xefe Estadu sai mai sa’e kedas karreta no foti-liman ho oin hamnasa bá jornalista sira.  

ha loron 14 Juñu 2023, Prezidente Repúblika (PR), José Ramos-Horta, hala’o viajen urjente ida bá Darwin-Austrália, hodi bá halo tratamentu saúde ka medical check-up tanba iha loron hirak  liubá, Tersa-Kuarta (13-14/06/2023), Prezidente Repúblika, José Ramos-Horta, la tama servisu hanesan baibain tanba moras no presiza deskansa uitoan.

Lee Mós : Prezidente Repúblika Nia Saúde Di’ak Loos

Jornalista: Rogério Pereira Cárceres