Hatutan.com, (28 Jullu 2023), Díli- Ministru Komérsiu no Indústria (MKI), Filipus Nino Pereira, hateten governu sei halo revizaun bá Dekretu-Lei númeru 29/2011 kona-bá presu justu hodi hamosu Lei Padraun bá presu atu bele padroniza  folin sasán iha merkadu nasionál.

Lee Mós : Xanana Seidauk Rona Folin Nesesidade Báziku Sa’e no Promete Hatún Impostu

Ministru Komérsiu no Indústria (MKI), Filipus Nino Pereira, vizita Merkadu Manleuana, Díli, Sesta (28/07/2023). Foto/Elio dos Santos da Costa

Ministru Komérsiu no Indústria (MKI), Filipus Nino Pereira hateten,  Timor-Leste iha ona lei kona-bá presu justu, ne’ebé regula ho Dekretu-Lei númeru 29/2011 atu Governu utiliza hodi kontrola no fó kbiit ba Ministériu Komérsiu no Indústria liuhosi Diresaun Nasionál Regulasaun Komersiál no Protesaun Konsumidór (DNRKPK)  ne’ebé kada semana no kada fulan sempre áa halo inspesaun no monitorizasaun bá presu sasán sira ne’ebé sirkula iha merkadu nasionál.

“Ita presiza iha revizaun ida bá Dekretu-Lei presu justu ne’e para ita iha padraun ida bá padroniza presu. Mesmu nune’e, ita sei kontínua sura mós ho kustu operasionál, produsaun inklui mós taxa atu bele iha padraun ida justu bá folin sasán,” Ministru Filipus Nino Pereira hateten.

Dekretu-Lei kona-bá presu justu mós regula kona-bá krime Asaun Barkeamentu ka “han matak ema”, no mós espekulasaun tamba ne’e liuhosi Dekretu-Lei ne’e fó  espasu bá Governu atu halo kontrolu bá vendedór sira  atu labele halo espekulasaun ba folin sasán.

Mesmu Timor-Leste adopta merkadu livre, tuir Nino Pereira, tenke iha sistema kontrolu ida d’iak no rigór atu bele evita ema halo espekulasaun ba folin sasán. Ho nune’e, parte AIFAESA no Diresaun Nasionál Regulasaun Komersiál no Protesaun Konsumidór rutinamente halo kontrolu intensiva atu labele iha espekulasaun bá folin sasán tuir deit parte  ida nia hakarak.

“Ba espekulasaun sira ne’ebé vendedór sira halo, iha sansaun administrativa no mós sansaun ida todan liu mak taka negósiu,” Nia hateten.

Jornalista: Vito Salvadór