Hatutan.com, (04 Outubru 2023), Díli- Ministru Komérsiu no Indústria (MCI, sigla portugés), Filipus Nino Pereira, hateten Governu sei tau millaun $4 hodi fó subsídiu bá empreza importadór foos atu bele fasilita hatún folin foos iha merkadu nasionál.

Lee Mós: Governu Fa’an Ona Foos Kada Saku 25kg ho Folin $12.00

Governu lansa intervensaun merkadu hodi fa’an foos ho folin $12.00 kada saka 25kg. Foto/Elio dos Santos da Costa

Ministru Komérsiu no Indústria, Felipus Nino Pereira afirma tan kona-bá subsídiu bá importadór sira MCI  aprezenta ona bá iha Ministériu Finansas kona-bá nia prosesu atu halo pagamentu.

Nia afirma Governu mantein ho polítika subsídiu bá empreza importadór foos tamba desizaun ne’e foti iha Konsellu Ministru.

Advertisement

“Ita mantein ho polítika subsídiu ba empreza importadór foos tanba desizaun ne’e foti ona iha Konsellu Ministru hanusá mak ita atu muda fali,” Ministru  Felipus Nino Pereira bá jornalista sira iha Palásiu Governu,Kkuarta (04/10/2023).

MCI iha ona dadus husi empreza importadór sira no subsídiu nia montante ne’e iha hotu ona hein de’it MCI ofisializa ho Ministériu Finansas depois hahú implementa.

“Montante subsídiu ba empreza importadór sira por volta  millaun $4 no  subsídiu ne’e bele fasilita povu asesu foos ne’e ho presu $12.00 no subsídiu bá empreza importadór sira ne’e foti husi orsamentu dotasaun todo governu nian,” nia esplika..

Polítika Fa’an Foos La’ós Milagre

Ministru Komérsiu no Indústria (MCI, sigla portugés), Filipus Nino Pereira. Foto/Elio dos Santos da Costa

Ministru Komérsiu no Indústria Felipus Nino Pereira hateten kona-bá polítika Governu nian hodi fa’an foos liu husi Sentru Lojístika Nasionál (CLN, sigla portugés) atu fasilita komunidade sira bele sosa foos ho presu $12.00 no polítika ida ne’e sei la’o fazeadamente tuir polítika ne’ebé Governu iha.

“Kona-bá polítika fa’an foos ne’ebé Governu iha sei iha fazeadamente tamba ne’e la’ós ita halo milagre ne’ebé ita fila liman de’it buat hotu hanesan ne’e kedas,”  Ministru  Felipus Nino Pereira hateten.

Advertisement

Nia hatutan buat hotu sei la’o tuir nia prosesu no Ministériu liu husi CLN garante katak ema hotu-hotu sei hetan foos ho presu $12 kada saku 25kg.

Luta Hamutuk Apoia

Diretór ONG Luta Hamutuk, José Alves da Costa, konsidera polítika Governu fó subsídiu bá importadór foos sira ne’e nu’udár desizaun urjente ne’ebé di’ak liu hodi bele normaliza folin foos ne’ebé dau-daun ne’e sa’e makas iha merkadu nasional.

José Alves da Costa dehan,   fó subsídiu bá empreza importadór foos  hanesan meius ida  atu normaliza fali sasán folin ne’ebé mak povu atu mai hola ne’e.

 Nia  fó  ezemplu hanesan folin foos balun lolos ne’e atu fa’an $17.00 ka $18.00, maibé hakarak ka lakohi  empreza sira tenke  hatún nia folin  bá $12.00  tanba Governu fó ona subsídiu.

Advertisement

“Ita aseita, ita aseita ho politika ne’e,  se agora aban-bairua,  kalan ida ne’e ema atu han  etu  maibé folin foos ho $20.00  ema ne’e labele sosa, ne’ebé husi parte Luta Hamutuk aseita  bá iha polítika ne’ebé mak dau-dauk Governu halo fó subsídiu ba iha empreza importadór foos atu normaliza folin foos  iha merkadu,” Jose Alves da Costa hateten bá Hatutan.com iha nia servisu fatin.

Tuir nia hanoin, polítika fó subsídiu ne’e fó vantajen bá empreza no povu rasik, tanba bele hatán urjente bá povu nia halerik atu bele hetan foos ho folin razoavel.

Liga ho politika Governu nian kona ba fa’an foos lokal ho folin baratu, Jose Alves da Costa hatutan ida ne’e mos polítika di’ak ida maibé Governu Persija investe iha setór agrikultura atu hasa’e produsaun rai-laran tanba daudaun ne’e natar barak mak abandonadu.

Tuir Luta hamutuk politika governu hodi normaliza folin foos ne’e justu ona, maibé presiza iha kontrolu ne’ebé di’ak iha prosesu distribuisaun foos lokal ne’ebé dau-daun ne’e Governu fa’an ho folin $12.00  bá kada  25kg .

“Ha’u hanoin la presiza CLN bá fa’an direita, transfere de’it bá loja sira fa’an ho folin ne’ebé Governu deside ona. Governu mak tun direita simu osan husi konsumidór sira ne’e mós la di’ak, tanba sai afeta bá kustu no alojamentu funsionáriu sira ne’ebé tuun bá baze,” nia hateten.

Advertisement

 Jornalista: Vito Salvadór/Leopoldina de Carvalho

Advertisement