Hatutan.com, (09 Agostu 2023), Díli—Prezidente Repúblika (PR), José Ramos-Horta hala’o vizita bá -Jakarta-Indonézia hanesan vizita partikulár no la presiza autorizasaun hosi Parlamentu Nasionál (PN).

Ramos-Horta fila hikas hosi Indonézia hafoin vizita privada no partisipa aniversáriu Fundasaun Jakarta Post, iha Aeroportu Internasionál Prezidente Nicolau Lobato, Kuarta (09/08/2023). Foto: Elio dos Santos da Costa.

“Foin fila hosi Jakarta, hanesan ita bo’ot sira hatene vizita partikulár la presiza autorizasaun hosi Parlamentu Nasionál. Maibé informa de’it tuir konvite mai hosi Jakarta Post atu partisipa iha sira nia selebrasaun tinan 40 fundasaun nian,” Ramos-Horta hateten iha Aeroportu Internasionál Prezidente Nicolau Lobato, Kuarta (09/08/2023).

Lee Mós: Iha Diálogu Demokrasia “Jakarta Post”, Ramos-Horta Afirma Demokrasia Tenke Sai Núkleu Pasifika iha Sudeste Aziátiku

Durante iha Jakarta Ramos-Horta la preokupa atu husu enkontru ho Prezidente Joko Widodo, maski  hala’o duni enkontru ho Ministra Negósiu Estranjeira no Kooperasaun Indonézia, Retno Lestari Priansari Marsudi, maibé sira ko’alia nu’udár amigu no lakohi atu enkomoda ema.

“Ha’u la hatene Parlamentu Nasionál preokupa ka la’e ho vizita privadu ne’e. Se preokupa ba ha’u nia saúde karik ha’u agradese. Ne’e hatudu aman inan sira iha Parlamentu preokupa ho sira nia Prezidente Repúblika, maibé atu dehan vizita ne’e privadu duni. Purtantu vizita privadu la’ós vizita ofisiál, apezar vizita privadu protokolu no seguransa 100-resin mak tau-matan ba ha’u nia vizita no hasoru ho ema lubuk ida, mas privadu,” Ramos-Horta subliña.

Ramos-Horta kumpre konvite hosi The Jakarta Post tanba la’ós foin mak koñese Jakarta Post, maibé desde uluk kedan tinan 1974, entaun simbóliku ba ho jornalista lubuk ida hosi Indonézia, tanba ne’e mak hatan ba konvide ne’e.

Iha Forum Demokrasia ne’ebé organiza hosi Jakarta Post, Prezidente Repúblika José Ramos-Horta ko’alia kona-bá demokrasia iha mundu, iha Sudeste Aziátiku liu-liu iha ASEAN ne’ebé ema barak análiza katak, demokrasia hakiduk daudaun iha mundu. Nia fó hanoin katak, iha prossesu demokrasia dala ruma hasoru dezafiu bo’ot, maibé demokrasia sempre tau aas valór sira direitu umanu nian nune’e demokrasia nunka hakiduk.

 Lee Mós: Ramos-Horta Nonton Konser Semesta Kris Dayanti

Jornalista: Vito Salvadór