Hatutan.com, (14 Agostu 2023), Díli—Primeiru-Ministru (PM), Kay Rala Xanana Gusmão liu hosi Despaixu númeru 03/PM/VIII/2023 kona-bá kriasaun grupu traballu bá reforma Seitór Justisa, nomeia Eis Ministra Justisa, Lúcia Maria Brandão Freitas Lobato hanesan koordenadora.

Lúcia Maria Brandão Freitas Lobato. Foto: dok Lucia Lobato.

Despaixu ne’e publika ona iha Jornál Repúblika tanba IX Governu Konstitusionál iha determinasaun atu promove reforma Seitór Justisa ho objetivu atu iha transparénsia no responsabilidade ba sidadaun sira.

Lee Mós: Reforma Setór Justisa no Administrasaun Públika Sai Mós Prioridade CNRT

“Situasaun atuál seitór justisa ne’ebé karakteriza ho enkuadramentu legál ne’ebé defisiente ka la apropriadu ba ita-nia realidade, infraestrutura no difikuldade ne’ebé la sufisiente kona-bá formasaun no kualifikasaun ba ita-nia rekursu umanu no kondisaun fundamentál sira atu permite assesu justisa ba ema hotu,” Hatutan.com sita despaixu.

Relasiona ho Artigu 6 númeru 3 hosi Dekretu-Lei númeru 46/2023, 28 Jullu, ne’ebé define katak “Hosi Xefe Governu, Primeiru-Ministru iha kompeténsia atu fó sai diretiva sira ne’ebé ho objetivu ba kualkér membru Governu no atu foti desizaun kona-bá assuntu sira inklui área sira ne’ebé atribui ba kualkér Ministériu ka Sekretáriu Estadu, nune’e mós kria komisaun ka grupu servisu sira ne’ebé iha kompeténsia Governu nian.

Nune’e, bazeia ba parágrafu 3 hosi artigu 6 Dekretu-Lei númeru 46/2023 28 Jullu, determina hanesan tuir mai ne’e:

Kriasaun grupu traballu ba reforma Seitór Justisa nian, depende ba Primeiru-Ministru, nu’udár dalan ida atu responde ba nesesidade atu fornese estrutura agil ida ba Governu, ne’ebé ho ekuididade, sai hanesan pontu fokál ida ho entidade hotu-hotu ne’ebé kompostu hosi setór justisa.

Funsaun prinsipál  hosi Grupu Traballu maka koordena no elabora proposta téknika no polítika sira ne’ebé sei permite, iha diálogu ida-ne’ebé liga ho instituisaun hotu-hotu iha seitór ne’e, atu promove implementasaun programa governu nian, atu atualiza planu estratéjiku ba seitór 2011 -2030 (PEJ), no mós atu dezenvolve proposta sira ne’ebé rezulta hosi estudu hirak ne’ebé foin lalais liu kona-bá funsionamentu sistema justisa formál.

Grupu traballu sei iha funsaun barak liu ne’ebé Primeiru Ministru fó, tanba ne’e maka  Lucia Maria Brandão Freitas Lobato hetan nomeasaun nu’udár koordenadora ba grupu servisu.

Membru grupu traballu barak liu maka nomeadu tuir orden Primeiru-Ministru nian.

Órgaun no servisu sira administrasaun publika nian tenke kolabora ho grupu servisu nian, hodi kumpre ho rigorozu prinsípiu konstitusionál, separasaun podér, ho informasaun no fornese dokumentu sira ne’ebé sira husu atu kumpre misaun ne’e.

Apoiu administrativu ba grupu servisu ne’e fornese hosi Gabinete Primeiru-Ministru no Orden ne’e vigora iha loron ne’ebé publika iha Jornál Repúblika.

Jornalista: Vito Salvadór