Hatutan.com, (24 Agostu 2023), Díli-Parlamentu Nasionál (PN) liuhosi votasaun finál globál, aprova ona Orsamentu Retifikativu (OR) ho montante billaun $1.96.

Lee Mós: Diskursu Xanana Gusmão iha Aprezentasaun Proposta Lei Orsamentu Retifikativu 2023

PM Xanana Gusmão halo intervensaun iha sesaun aprezentasaun Orsamentu Retifikativu 2023 iha PN, Kinta (24/08/2023). Foto/Elio dos Santos da Costa

Orsamentu Retifikativu 2023 ne’ebé aprezenta hosi IX Governu Konstitusionál lidera hosi Xanana Gusmão hafoin debate durante loron tolu iha Parlamentu Nasionál aprova ho votu a-favór 41, kontra 0, no abstensaun 23.

Biar orsamentu ne’e pasa ona iha finál globál, maibé Primeiru Ministru (PM), Kay Rala Xanana Gusmão, enkoraja mós membru Parlamentu Nasionál (PN) hotu, la’os de’it bankada opozisaun, maibé mós bankada Governu atu fiskaliza ativu bá atividade Governu sira nian, liu-liu iha ezekusaun bá orsamentu sira ne’e.

“Hodi Nonu-Governu nia naran, ha’u halo apelu boot tebetebes ida. Fiskaliza ami, imi nia devér. La’ós de’it opozisaun, imi hotu tenke fiskaliza, para buat ne’e bele hala’o ho di’ak. Halo sala krítika, hahú hosi ita-boot sira ne’e,” Primeiru Ministru, Kay Rala Xanana Gusmão, enkoraja ida ne’e, iha ninia intervensaun ikus hafoin aprovasaun finál globál bá OR iha plenária PN, Kinta (24/08/2023).

Xefe Governu aproveita biban ne’e, hato’o nia agadesimentu boot bá distintu no deputada sira hotu, no bá ema hothotu ne’ebé partisipa iha loron tolu nia laran debate orsamentu Retifikativu ne’ebé nia governu aprezenta iha PN.

“Ita simu. Ita krítika malu, krítika, buat ida ne’e baibain. Ita krítika malu, rona, aprende bá malu no husu mós iha buat balu ne’ebé iha tinan-lima mai ne’e, ita atu halo hamutuk, favór ida, ita hamutuk bá, atu  serve povu ida ne’e. Obrigadu barak,” Xanana hateten.

Primeira vise Prezidente Parlamentu Nasionál, Maria Terezeinha Viégas, agradese bá Xefe Governu, tanba bele fó ona hanoin bá sira iha PN, atu hala’o didi’ak sira-nia kna’ar hanesan órgaun fiskalizador  atu  kontinua tau-matan ka fiskaliza atividade sira Governu nian.

“Obrigadu señor Primeiru Ministru, obrigadu maun-boot, bá xamada de atensaun ida ne’e, loos, ami tenke fiskaliza duni, kna’ar ida ne’e mak parlamentu nia kna’ar no mós, fó parabéns, votus de bom traballu, no susesu sira bá Nonu-Governu, nomós bá ita 65,” deputada Terezinha Viégas hateten.

Prezidente Parlamentu Nasionál en-ezersísiu ne’e, agradese dala-ida tán bá PM Xanana Gusmão ninia pasiénsia tomak, hodi hanorin sira atu banati tuir, tanba tempu agora  determinante tebes ba sira, nu’udár Timor oan, laiha ema ida hanoin katak rai ne’e la di’ak bá nia rai no mós bá nia povu.

“Nu’udár Timoroan hotu-hotu hanoin di’ak bá nia rai no nia povu, nu’udár Timoroan  bá deputadu sira embora  orsamentu retifikativu ita aprova ona, maibé ita iha papál importante ida atu bá la’o tuir  orsamentu ne’ebé maka ita aprova liuhosi  fiskalizasaun, ida ne’e maka importante,” deputada Terezinha tenik.

Maske Orsamentu Retifikativu ne’e, pasa ona iha finál globál, maibé, tuir regra normál, propósta orsamentu hirak ne’e, sei baixa bá komisaun C trata asuntu finansas públikas atu halo redusaun finál, molok entrega fila bá Governu, no sei haruka bá Prezidente Repúblika (PR) hodi promulga.

 Jornalista: Rogério Pereira Cárceres