Hatutan.com (21 Setembru 2023), Díli— Sosiedade sivíl Yayasan Hukum Asasi dan Keadilan (HAK), komemora loron mate jornalista internasionál hosi Olanda  ho naran Sanders Robert Thoenes ne’ebé mate bainhira hala’o serbisu jornalizmu iha Timor iha tempu difísil.

Diretór Ezekutivu Asosiasaun HAK, Feliciano da Costa Araújo hamutuk ho funsionariu no aliadu sira, inklui jornalista lori ai-funan ba kari iha Igreja Parókia Sagrado Coração de Jesus Becora Díli, Kinta (21/09), hodi komemora loron mate jornalista internasionál hosi Olanda ho naran Sanders Robert Thoenes. Foto: Lazaro Pereira Quefi.

Komemorasaun ne’e, hanesan jestu memorizasaun ida bá Jarnalista Olandés ne’e ninia dedikasaun hodi fó sai informasaun bá mundu kona-bá violasaun direitus umanus iha Timor Leste durante okupasaun.

Lee Mós: 16 Outubru Loron Nasionál Liberdade Imprensa, Jornalísta Labele Ta’uk Fó-Sai Lia-loos!

“Yayasan Hukum Asasi dan Keadilan (HAK) hanesan sosiedade sivíl ho nia aliadu sira, kolega no família balun hosi Olanda inklui jornalista sira iha Timor-Leste mai komemora nafatin atu memoriza nia dedikasaun ba rai ida-ne’e ninia ukun an,” Diretór Ezekutivu Asosiasaun HAK, Feliciano da Costa Araújo hateten iha Igreja Parókia Sagrado Coração de Jesus Becora Díli, Kinta (21/09).

HAK konsidera Amigu Sander Robert Thoenes  henesan jornalista ida hosi nasaun Olanda, bainhira referendu Timor Leste nian, iha tempu ne’ebá nia mai foti dokumentu balun atu fó-sai situasaun difísil Timor Leste nian ba mundu to’o nia Independénsia.

Feliciano Araújo konta tuir katak, iha loron 21 fulan Setembru 1999 bainhira Forsa Defeza Interfet mai tama ona iha Timor Leste iha loron 20 fulan Setembru, maibé tanba ho situasaun loron da-huluk nian, klaru katak invazór sira no forsa militár Indonézia nian inklui milísia sira hamosu konflitu oioin iha momentu ne’ebá.

Bainhira sira hit ain sai hosi rai doben Timor Leste ne’e, komesa hatudu sira nia presaun fíziku no espresa sira nia sentimentu emosionál nian to’o rezulta no tiru jornalista Sander Robert Thoenes mate iha fatin.

Sanders Robert Thoenes tones mate iha Igreja Sagrado Coração de Jesus nian tanba hetan tiru hosi Soldadu TNI sira bainhira hala’o nia funsaun jornalista.

HAK konsidera ida ne’e sai hanesan referénsia ida ne’ebé forte bá jornalista sira, signifika oinsa mak atu hatudu dedikasaun ba vida jornalizmu hodi hatudu forte liu tán, oinsa mak dedika an la’ós de’it ba hanesan ko’alia entermus de profesionál maibé hatudu mós ninia solidariedade no fraternidade ba ninia maluk jornalista sira seluk.

“Ita komunika ona ho saudozu nia familia sira iha Olanda atu oinsa prepara nia fatin. Komunika ona mós ho Governu Timor Leste no Padre sira iha Parókia ne’e atu bele fó autorizasaun hodi bele hadi’a nia fatin,” Feliciano Araújo informa.

Jornalista Estajiáriu: Lazaro Pereira Quefi