Hatutan.com (12 Outubru 2023), Díli—IX Governu Konstitusionál  liuhusi Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, atuál Xefe Negosiadór adezaun Timor-Leste (TL) nian bá Organizasaun Mundiál Komérsiu (OMK), Fransisco Kalbuadi Lay hamutuk ho delegasaun Timor-Leste konklui ona reuniaun daneen iha loron 11 Outubru 2023 iha Jenebra, Suísa.

Reuniaun Daneen Grupu Traballu iha loron 11 Outubru 2023 iha Jenebra, Suísa. Foto: Grupu Traballu.

Momentu importante ne’e  nu’udár pasu krusiál iha jornada Timor-Leste nian hodi sai membru  plenu ba organizasaun komersial globál ne’e.

Lee Mós: Prezensa TL iha Reuniaun Grupu Traballu OMK Hametin Diplomasia Komersiál

“Ofisialmente  Timor-Leste aprezenta pedidu formál hodi  sai membru OMK  iha fulan Novembru 2016. Nunee iha loron 7 Dezembru 2016, Konsellu Jerál OMK hahú kria Grupu Traballu hodi  ezamina pedidu Governu Timor-Leste  nian hodi  adere ba Organizasaun  Mundiál Komérsiu  haktuir hosi  artigu XII hosi Akordu Marraquexe nian ne’ebé institui OMK,” Hatutan.com sita komunikadu.

Durante reuniaun ne’e,  Timor-Leste hetan oportunidade hodi aprezenta progressu bá  reforma no kompromissu  nesesáriu  antes Timor-Leste sai membru OMK.

Permite mós diskusaun ho país  membru atuais OMK sira seluk kona-bá  termus kondisoens adezaun  Timor-Leste nian ba organizasaun ne’e.

Ajenda  Reuniaun Daneen  Grupu Traballu  inklui diskusaun kona-bá  várius tópiku, hanesan polítika komersiais, kuadru  jurídiku no kompromisu asesu bá merkadu. 

Reuniaun Daneen Grupu Traballu nu’udár reuniaun kuntinuasaun hosi reuniaun hirak ne’ebé Governu Timor Leste hala’o tiha ona hahú kedan hosi Reuniaun Dahuluk Grupu Traballu nian ne’ebé  realiza iha loron 1  Outubru 2020, daruak iha loron 29  jullu 2021, datoluk iha loron 29  Abril  2022, daha’at iha loron 30 Setembru  2022 no Dalima iha loron 20  Abril  2023.

Depois remata reuniaun, iha sesaun lorokraik Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, atual Xefe Negosiador adezaun Timor-Leste nian ba Organizasaun Mundial Komérsiu (OMK), Fransisco Kalbuadi Lay kontinua konklui negosiasaun bilaterais  kona-bá asesu  ba merkadu ho Embaixadora Katherine Tai hosi  Estadu Unidus liuhosi asinatura  akordu bilaterais entre pais rua ne’e. 

Antes ne’e Governu Timor-Leste, finaliza tiha ona akordu bilaterais kona-bá asesu bá merkadu ho país  membru OMK 7 sira seluk hanesan Australia, Nova Zelándia, Japaun, Kambodia, Uniaun Europeia, Philipina no Kanada.

Nune’e, iha fulan hirak oin mai, Timor-Leste ho dilijente sei esforsu hodi  finaliza kestaun pendentes  hodi  fornese dokumentu  adisionál inklui finaliza mos akordu bilaterais ho nasaun membru OMK sira seluk mak hanesan Indonázia no Tailándia.

Durante realizasaun Reuniaun Daneen iha Jenebra, Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, atual Xefe Negosiador adezaun Timor-Leste nian ba Organizasaun Mundial Komérsiu (OMK), Fransisco Kalbuadi Lay hetan akompañamentu hosi Ministru Transportes no Komunikasaun, Miguel Marques Gonçalves Manetelu no Ministru Komérsiu no Indústria, Filipus Nino Pereira.

IX Governu Konstitusionál kontinua empeña hodi konstrui  ekonomia ne’ebé metin no  sustentável  hodi benefisia ninia povu ne’ebé sei  kontribui ba komérsiu rejional no internasional bainhira Timor-Leste sai duni Membru OMK. 

Nune’e, adezaun Timor-Leste  ba OMK konsideradu nu’udár pasu fundamentál hodi alkansa  objetivu oinsa  mellora  perspetiva ekonómikas, promove mos lasus  mais forte ho komunidade internasionál.

Ikusliu, prezensa Timor-Leste iha OMK, signifika  dedikasaun Timor-Leste nian ba komérsiu  internasionál ne’ebé abertu no  transparente,  promove diversifikasaun  ekonómika hodi  mellora  ambiente  negósiu.

Jornalista: Leopoldina de Carvalho