Hatutan.com (17 Outubru 2023), Abu Dhabi- Prezidente Parlamentu Uniaun Emiratus Árabe (UEA), Saqr Ghobash, sei servisu makas iha orgaun lejislasaun parlamentár Abu Dhabi nian, atu nune’e, bele hametin kooperasaun bilaterál ho Timor-Leste iha área estratéjiku sira, liu-liu iha área ekonómiku, Turizmu no Infraestruturas.

Lee Mós: WIF 2023, Ramos-Horta Deklara TL iha Estabilidade Polítika Promove Investimentu

Prezidente Repúblika, Jose Ramos-Horta, hasoru malu ho Prezidente Parlamentu UEA, Saqr Ghobash iha Federal National Council, Abu Dhabi, Tersa (17/10/2023). Foto/Vito Salvadór

Prezidente Parlamentu Federál UEA, Majestade Saqr Ghobash afirma kompromisu ne’e bainhira delegasaun Xefe Estadu Timor-Leste, José Ramos-Horta vizita  Parlamentu Uniaun Emiradu Árabe (UEA), Segunda (17/10/2023).  

Prezidente Repúblika, José Ramos-Horta, informa hasoru malu ho Prezidente Parlamentu UEA hodi ko’alia kona-bá relasaun bilaterál entre Timor-Leste no UEA, liu-liu iha área polítika no ekonomia no mós área estratéjiku sira seluk ne’ebé sei lori benefísiu ekonómiku ba país rua.

“Ohin, ha’u ko’alia ho nia, no Prezidente Parlamentu Federál UEA nian hakarak vizita Timor-Leste, no ha’u hateten, favór mai, ha’u simu kedas, sira simpatia loos ho Timor, no nia promete atu apoia Governu federal nia inisiativa ruma atu tulun Timor-Leste,’’ Prezidente Repúblika José Ramos-Horta haktuir.

Jornalista Hatutan.com, Vito Salvadór ne’ebé akompaña vizita Estadu PR José Ramos-Horta nian bá Abu Dhabi, informa bá futuru UEA no Timor-Leste sei iha kooperasaun ida metin liután. País rua ne’ebé mós tau importánsia boot bá partisipasaun feto iha vida polítika no liu-liu iha nivel foti desizaun.

Ramos-Horta haktuir Parlamentu UEA nian 50% membru mai husi liurai nia desizaun no 50% mak reprezentante ne’ebé povu nian.

Prezidente Repúblika Jose Ramos-Horta nia enkontru ho Prezidente Parlamentu UEA ne’e, akompaña mós hosi Vise Primeiru-Ministru no Ministru Koordenadór Asuntu Ekonomia no Ministru Turizmu no Ambiente , Francisco Kalbuadi Lay no vise ministra asuntu ASEAN Milena Ragel no mós delegasaun husi Palásiu Prezidensiál ne’ebé akompaña vizita Estadu ne’e. ###