Hatutan.com, (17 Outubru 2023), Díli—Embaixadora Xína iha Timor Leste (TL), Wang Wenli, hala’o enkontru ho Primeiru Ministru (PM), Kay Rala Xanana Gusmão, hodi ko’alia kona-bá kooperasaun bilaterál entre nasaun rua iha área espesífiku sira.

Embaixadora Xína iha Timor Leste (TL), Wang Wenli hala’o enkontru ho Primeiru Ministru (PM), Kay Rala Xanana Gusmão iha Palásiu Governu, Segunda (16/10/2023). Foto: GPM.

Iha enkontru ne’e Wang Wenli aprezenta kompromissu ba Xanana Gusmão liuliu Xina sei kontinua apaoia TL iha área espesifiku sira hanesan infraestrutura, saúde, agrikultura no dezenvolvimentu ekonómiku.

Lee Mós: Millaun $1-resin Harii Torre-3, La Inklui Ekipamentu Tanba Oferese Hosi Governu Xina

“Xína ho Timor Leste iha relasaun di’ak durante ne’e. Relasaun ne’e sempre la’o ho fuan. Xina mós partisipa ativamente iha prossesu dezenvolvimentu konstrusaun Timor Leste no atividade ekonomia sira. Ita presiza kontinua servisu hamutuk iha área espesífiku sira hanesan infraestrutura, agrikultura, saúde no dezenvolvimentu ekonomíku,” Wang Wenli hateten hafoin ekontru ho Primeiru Ministru iha Palásiu Governu, Segunda (16/10/2023).

Durante dékada rua ne’ebé Timor Leste ho Xina hahú estabelese relasaun diplomátiku to’o ohin loron, Xína ho firme kontinua apoia TL.

Xína apresia ho prossesu dezenvolvimentu ne’ebé Timor Leste konsege alkansa durante tinan 20 nia laran.

Embaixadora ne’e mós louva beleza sidade Dili nian, no konsidera katak Dili nu’udár sidade ida ne’ebé iha poténsia bo’ot ba seitór turizmu.

“Primeiru Ministru hanoin oinsa TL iha ninia sentru produsaun rasik atu bele prodús produtu iha rai laran no hamenus sasan importasaun,” Wang Wenli informa.

Jornalista: Leopoldina de Carvalho