Hatutan.com, (27 Dezembru 2023), Díli-Polisia Nasionál Timor-Leste (PNTL) Munisípiu Díli kaptura no detein ema na’in-11 iha sela detensaun tanba deskonfia envolve iha kazu krime durante selebrasaun festa Natál iha Díli.

Lee Mós: Kazu Asalta iha Saburai, PNTL Kaptura JV no Sira Seluk Sei Halai Subar

Komandante PNTL Munisípiu Díli, Superintendente Xefe Orlando Gomes, informa, durante selebrasaun loron Natál nian, hosi loron 24 to’o loron 25 fulan-Dezembru ne’e, membru PNTL koloka iha fatin-fatin hodi garante estabilidade iha ámbitu festa natál.

Komandate PNTL Munisípiu Díli, Superintendente-Xefe Orlando Gomes. Foto/Média PNTL

Iha festa natál ida-ne’e ekipa komandu Munisípiu Díli nian rejistu kazu kríme hamutuk 38. Hosi kazu sira ne’e, iha kazu 14 mak aas liu. Tipu kazu ida maka Ofensas Integridade Fízika Simples, no tuir fali, kazu Dano Simples, hamutuk lima. Kazu sira ne’e akontese barak liu ne’e, iha área Postu Administrativu Dom Aleixo.

“Durante dia 24 ho 25, ita detein suspeitu kuaje na’in-11. Na’in-haat iha Fraglante de lito, ita detein oras 72, ida aprezenta ona, no tolu sei iha prosesu,” Superintendente Xefe Polísia Orlando Gomes, informa bá jornalista sira iha kna’ar fatin komandu PNTL Munisípiu Díli, Kuarta (27/12/2023).

Iha selebrasaun festa natál ne’e, mosu mós kazu insidente ida iha área Ailok Laran nian, grupu rua tuda-malu, ikus mai, rezulta Vise Ministra bá asuntu Association of South East Asean Nation (ASEAN), Milena Maria da Costa Rangel, ninia kareta vidru oin rahun.

“Suspeitu na’in-rua ami kaptura kedas iha fatin akontesimentu, depois ami halo identifikasaun bá suspeitu na’in-rua ne’e, sira deskobre tán fali sira seluk, ne’e hamutuk suspeitu na’in-hitu mak ami halo ona identifikasaun, no agora dadauk husu mandadu detensaun,” nia informa.

Iha Kuarta, 27 fulan-Dezembru ne’e, Superintendente Xefe Polísia Orlando Gomes halo ona enkontru ho nia Komandante Operasaun Díli, Inspetór Xefe Polísia José Amaral, hodi haree fali planu operasaun nian bá iha loron 31  fulan-Dezembru 2023 ho loron 01 fulan-Janeiru 2024 nian.

Iha selebrasaun festa natál tinan 2023, foin lalais, Komandu PNTL Munisípiu Díli rejista mós kazu asidente tráfegu hamutuk neen (6), no prosesu oras ne’e la’o hela seksaun tránzitu, hodi hein evidénsia nia na’in sira, bá selu iha banku, hafoin bele foti fila-fali sira ninian transporte motorizada ka karreta ne’ebé polísia apreensaun.

Jornalista: Rogério Pereira Cárceres