Hatutan.com, (08 Janeiru 2024), Díli-Polísia Nasionál Timor-Leste (PNTL) Munisípiu Díli detein joven mane na’in-15 iha sela detensaun Polísia tanba sobu seremónia festa Natál hamutuk iha área Ai-tarak Laran, Díli.

Lee Mós: Atrasaun Prezépiu Natál 2023 Iha Palásiu Prezidensiál Manán $1.000 to’o $250

Suspeitu sira. Foto/Tome da Silva

Komandante PNTL Munisípiu Díli, Superintendente Xefe Orlando Gomes, informa insidente ka konfrontu ne’e akontese iha Domingu (07/01/2024), tuku 04:00 madrugada, iha área Kampung Alor, Aldeia Anin-Fuik, Suku Kampung Alor, Postu Administrativu Dom Aleixo, Díli.

Festa Natál hamutuk ne’e hodi selebra mós sira-nia vitória hanesan vensedór bá “Prezépiu Di’ak Liu tinan 2023”, ne’ebé mak avalia hosi ekipa avaliadór sira iha Prezidénsia Repúblika, no hetan mós prému osan hosi Prezidente Repúblika, José Ramos-Horta, foin lalais. Maibé, tanba grupu joven sira seluk iha duni bairo Ai-tarak Laran ne’ebé senta insatisfasaun, tanba sira la hetan prémiu, no la satisfás liután grupu joven hosi prezépiu seluk nian halo festa, ikus mai, suspeitu sira ne’e bá halo problema iha festa laran to’o festa ne’e mós paradu.

Ho akontesimentu ne’e, pesoál Servisu Informasaun Polísia nian ne’ebé besik, informa kedan bá ekipa forsa rezerva komandu Díli nian hodi halo atuasaun iha terrenu no akalma situasaun.

“Sira tuda-malu tanba sira balu la satisfás ho kompetisaun kona-bá prezépiu ninian, tanba ne’e mak sira halo festa iha momentu ida ne’ebá, iha grupu balu la satisfás, entaun, sira  tuda-malu,” Komandante Orlando Gomes, informa bá jornalista sira iha kna’ar fatin, Segunda (08/01/2024).

Bainhira Polísia to’o iha lokál insidente, joven ka suspeitu sira ne’e, fila, halo fali asaun tuda hasoru membru PNTL sira. Nune’e, iha duni madrugada ne’e, membru Polísia sira ne’e halo kedas kapturasaun bá suspeitu sira hamutuk ema na’in-20.

“Iha momentu ne’e, Polísia halo kapturasaun bá suspeitu sira kuaje na’in-20. Depois ita lori bá halo identifikasaun, depois maka Polísia halo prosesu investigasaun, hatama sira bá sela oras 72 nia laran  no polísia aprezenta ona bá iha Ministériu Públiku para hodi halo primeiru interrogatóriu,” Orlando Gomes tenik.

Hosi identifikasaun, Polísia liberta tiha na’in-lima (5) tanba prova la sufisiente no detein hela sira na’in-15. Nune’e, suspeitu na’in-15 ne’ebé komete  kríme Obstrusaun bá Ordém Autoridade Públiku tanba sira tuda-hasoru ajente seguransa sira Estadu nian durante atuasaun  aprezenta bá Ministériu Públiku.  

Jornalista: Rogério Pereira Cárceres