Hatutan.com, (20 Janeiru 2024), Díli— Ministru Justisa (MJ), Amândio dé Sa Benevídes husik-iis (mate) iha Hospitál Nasionál Guido Valadares (HNGV), Bidau, Díli, ho idade 60 hafoin sofre atakasaun fuan iha Sala VIP Aeroportu  Internasionál Prezidente Nicolau Lobato, Sábadu (20/01/2024).

Tuir informasaun ne’ebé Hatutan.com rekolla katak, iha dadeer Ministru bá simu Primeiru-Ministru (PM) Kay Rala Xanana Gusmão iha Aeroportu internasional Nicolao Lobato ne’ebé foin mak fila hosi Suiça, no Ministru hetan kedan atakasaun fuan, ekipa médiku konsege transporta ba HNGV maibé la konsege salva.

Lee Mós: Ministru Amândio Lakohi Promete Maibé Esforsu Lori tán Pasaporte 52.000 Mai TL

Amândio dé Sa Benevídes moris iha loron 16 Jullu 1964, iha Munisipiu Ainaro. Remata nia lisensiatura iha Direitu Konstitusionál iha Universidade Nusa Cendana Kupang, Kupang – Republika Indonezia, iha tinan 1990 fila fali ba Timor-Leste hodi servisu nu’udar advogadu privadu iha Dili, atividade profisionál ida-ne’ebé nia hala’o husi tinan 1991 to’o 1993.

Iha Dili Amandio nu’udar funsionáriu públiku hosi tinan 1993 to’o 1999. Durante períodu ida-ne’e, nia hala’o kursu oin-oin iha área administrasaun no jestaun publika.

Durante Administrasaun Tranzitoriu Nasoins Unidas nian (UNTAET), nia sai hanesan Prokuradór iha Ministeriu Publiku Timor-Leste nian dahuluk ida-ne’ebé iha pozisaun iha Administrador Sérgio Vieira dé Mello nia oin, iha Fevereiru 2000.

Nia hetan nomeasaun nu’udar Advogadu Jeral ba Krime Komún iha loron 16 fulan-outubru tinan 2001, hodi troka Longuinhos Monteiro, ne’ebé asume pozisaun nu’udar Prokurador Jeral.

Maski hetan nomeasaun durante períodu UNTAET, ho aprovasaun ba Dekretu-Lei no. 1/2002, iha rejime transferénsia sistema judisiáriu nian, nia nafatin iha pozisaun to’o 2005.

Iha tinan ne’ebé hanesan, nia remata ona kursu pos-graduasaun iha Estudu Anti-Korrupsaun iha Fatin Universidade iha Hong Kong, Republika Popular Xina. Entre tinan 2004 no 2005 nia kaer pozisaun nu’udar Komisariu Komisaun Nasional Eleisaun (CNE).

Iha loron 01 fulan jullu 2023 hetan konfiansa hosi Primeiru-Ministru Kay Rala Xanana Gusmão hodi asume mos responsabilidade hanesan Ministru Justisa (MJ).

Jornalista: Rogério Pereira Cárceres