Hatutan.com, (08 Fevereiru 2024), Díli—Bankada FRETILIN iha tempu badak sei submete Projetu Lei kona-bá konfisaun Relijioza bá Parlamentu Nasionál (PN), hodi bele regula no garante direitu sidadaun sira ne’ebé iha diferensa relijiaun.

Membru Bankada FRETILIN iha Parlamentu Nasionál (PN), Joaquim dos Santos. Foto/Tome da Silva.

Deputadu bankada FRETILIN, Joaquim dos Santos Boraluli hateten, Estadu Repúblika Demokrátika Timor Leste (RDTL) ne’e nu’udár Estadu Laiku.

Lee Mós: Alterasaun Lei Pensaun Vitalísia, PLP-KHUNTO Hein Seriedade CNRT-FRETILIN-PD

Tanba ne’e, nia dehan, tratamentu bá sidadaun hotu-hotu tenke hanesan bazeia bá Konstituisaun RDTL artigu 16 kona-bá universalidade direitu sidadaun hotu-hotu nian hanesan iha Lei nia oin.

Alende ne’e mós deputadu sita iha artigu 45 K-RDTL kona-bá liberdade konfisoins relijiozu, tanba ne’e maka to’o agora Parlamentu Nasionál seidauk iha lejizlasaun espesífiku.

“Tempu ona para Parlamentu Nasionál iha inisiativa hodi fó garante sidadaun diferensa relijiaun sira-nia diretu,” deputadu Joaquim dos Santos Boraluli hateten iha PN, Kinta (08/02/2024).   

Liga bá direitu kazamentu ho nia efeitu, deputadu nee dehan tanba iha ne’e maioria fé Kristaun depois tuir-mai muda konfisaun sira ho Izlámiku, nune’e sosidade ne’e moris iha pluralidade relijioza, tenke konsidera hanesan rikeza Eestadu nian, maibé presiza regula bá interasaun sosiál, nune’e mós responsabilidade autoridade Governu nian atu garante ezersísiu direitu sidadaun nian.

Maski la esplika detallada kona-bá konteúdu hosi Prejetu Lei ne’e, maibé eis Prezidente Komisaun A ne’e dehan, Projetu Lei ne’e preparadu no sei aprezenta iha PN iha tempu badak nia laran.

Jornalista Estajiária: Zita Menezes