Hatutan.com, (19 Fevereiru 2024), Díli—Komandu Polísia Nasionál Timor-Leste (PNTL) ho FALINTIL-Forsa Defeza Timor-Leste (F-FDTL) estabelese ona ekipa ida hodi halo investigasaun bá kazu insidente tiru membru F-FDTL hosi Komponente Navál iha área Taibessi-Likintae, Suku Lahane Orientál, Postu Administrativu Verra Cruz, Munisípiu Díli.

Membru F-FDTL ne’ebé hetan tiru, deskonfia involve hosi membru PNTL presta deklarasaun iha sala DIK, Segunda, (19/02/2024). Foto: Elio dos Santos da Costa.

Insidente ne’e akontese iha Domingu (18/02/2024), tuku-tolu, oras madrugada no kazu ne’e rasik, deskonfia involve hosi autór ida hanesan membru PNTL, hosi Unidade Espesiál Polisia (UEP).

Lee Mós: Kazu Membru Polísia Tiru Joven iha Bidau, Komandu Sei Enkamiña bá Ministériu Públiku

Hatutan.com halo ona konfirmasaun ho Segundu Komandante PNTL, Komisáriu Polisia Pedro da Costa Belo, maibé nia dehan, informasaun kona-bá kazu ida-ne’e komandu delega ona kompeténsia bá Komandante Operasaun Nasionál, Superintendente Xefe Polisia José Soares.

Bainhira konfirma fali ho komandante operasaun nasionál ne’e nia parte informa katak, komandu mak iha liu kompeténsia atu anúnsia informasaun kona-bá kazu tiru ne’e bá públiku.

Hatutan.com mós nafatin buka halo konfirmasaun kazu ne’e ho Xefe Departamentu Investigasaun Kriminál Nasionál (DIKN), Superintendente Polisia João dos Reis Belo, no hatán katak, prosesu investigasaun bá kazu insidente ida-ne’e, sei la’o hela no seidauk finál.

Bainhira investigasaun mak konklui ona mós, komandu rua de’it, liu-liu lideransa másimu PNTL ho F-FDTL nian mak bele relata progersu no rezultadu investigasaun kazu ne’e bá públiku.

Kronolójia Kazu

Maski informasaun kronolójika ofisiál nian hosi komandu PNTL ho F-FDTL seidauk iha, maibé, informasaun seluk ne’ebé Hatutan.com asesu hosi fontes oioin, hato’o katak, iha loron Domingu (18/02/2024), vítima ne’ebé hanesan membru Forsa Naval ne’e  utiliza nia motorizada, komete violasaun bá lei kódigu estrada nian, iha ne’ebé liu fali hosi diresaun estrada merkadu Taibesi nian, bá hasoru autór  ho kareta diresan hosi Taibesi atu bá uma iha merkadu kotuk.

Nune’e, autór ne’e hakilar ho lia-fuan dehan, tanba saida mak kontra fali regras. Hafoin ida ne’e, vítima hasai kedan lia-fuan tolok hodi temi mós suspeitu nia inan-aman, no husu suspeitu ninia hakarak loloos ne’e saida, hodi halai liu kedan bá diresaun Likintae atu bá hali-laran.

Autór ho nia kareta bá estasiona hela iha paderia Likintae, depois vítima ho nia kolega fila-fali ho motor bá ho linguajen ne’ebé mak hanesan, ko’alia hasoru membru PNTL ne’e.

Tanba la aseita ho liafuan má-trata hirak ne’e hotu maka autór foti médida tiru bá leten atu hatudu katak nia membru seguransa ida.

Maibe, vítima ho ninia kolega sira, nafatin halo tentativas atu halo asaun hasoru membru PNTL ne’e, tanba ne’e maka membru UEP ne’e foti desizaun hodi tiru maibé la indika bá vítima, autór tiru bá rai, ikus mai bala musan mak kona bá rai depois haksoit hodi kona fali vítima.

Observasaun Hatutan.com iha Segunda, 19 fevereiru 2024 iha kuartél jerál PNTL, Caicoli-Dili, nota katak, membru Unidade Polísia Militár (PM) nian ho kareta operasaun isin-ida, akompaña hela mós vítima ne’ebé mak bá hato’o ka presta ninia deklarasaun iha Departamentu Investigasaun Kriminál Nasionál (DIKN).

Kona-bá suspeitu ne’ebé tiru, dadaun ne’e PNTL deteian ona iha sela polisia komandu Munisipiu Dili nian iha Caicoli, no hafoin ida ne’e, sei kontinua kedan ho prosesu kontinuasaun.

Jornalista: Rogério Pereira Cárceres