Saúde

MS Loke Investigasaun Interna bá Projetu Fornesimentu sira Ne’ebé Deskonfia “Monopóliu” hosi Empreza 7

Published

3 years ago

22/02/2024

Hatutan.com, (22 Fevereiru 2024), Díli—Ministériu Saúde (MS), daudaun ne’e, halo hela investigasaun interna hodi buka hatene maneira sira oinsá mak durante tinan 2022 to’o mai 2023 empreza hitu (7), maioria empreza estranjeiru, deskonfia sempre manan projetu fornesimentu produtu medikamentu no farmaséutika bá SAMES (Serviço Autónomo de Medicamentos e Equpamentos de Saúde) ho MS rasik.

Lee Mós: Deskonfia Fa’an Ilegál Ai-moruk Item Neen iha Farmásia Moris-Foun, Polísia Detein Suspeitu Na’in-tolu

Ministra Saúde, Élia A.A dos Reis Amaral. Foto/Tome da Silva

Dokumentu komprovadu sira ne’ebé Hatutan.com asesu hatudu katak durante tinan 2022 mai to’o 2023, empreza hitu (7) ne’e mak permanente manan projetu fornesimentu produtu medikamentu no farmaséutika iha SAMES ho institutu sira seluk ne’ebé tutela bá Ministériu Saúde (MS).

Empreza sira-ne’e mak hanesan;

STAMFORD MEDICAL, LDA,
ISTANA FARMACIA, LDA,
INTI SUMBER RICNA, LDA,
FOHO OSAN MEAN PHARMACIA,
GST CORPORATION LIMITED,
3D LIFE SCIENCE TIMOR, LDA,
HUSADA GROUP (BETHESDA HUSADA), UNIP, LDA,

Relasiona ho informasaun ne’e Ministra Saúde Élia A.A dos Reis Amaral hateten ida-ne’e iha hela faze investigasaun no depois mak sei fó relatóriu no parte investigasaun interna Ministériu Saúde mak sei tama konta hela.

Ministra Élia A.A dos Reis Amaral hatutan, atu hakle’an investigasaun ne’e parte Gabinete Investigasaun no Auditoria da Saúde (GIAS) mak sei haree no nia prosesu la’o hela no karik iha la kuna signifika iha dunik monopóliu bá prosesu sosa produtu medikamentu no farmaséutika iha Ministériu Saúde sei prosesu tuir Lei ne’ebé vigora.

“Se akontese dunik monopóliu ka manobra iha prosesu konkursu públiku bá fornesimentu hotu iha Ministériu Saúde relasiona ho empreza hitu (7) ne’e maka Ministériu Saúde sei prosesa tuir prosedimentu legal,” Ministra Élia A.A dos Reis Amaral responde Hatutan.com iha hafoin prienxe programa Meet The Press iha Palásiu Governu, Kinta (22/02/2024).

Karik iha indísiu pratika nepotizmu no korrupsaun iha prosesu ne’e, Ministra Élia Amaral hateten, nia seidauk bele pronunsia tanba sei iha prosesu investigasaun nia laran.

Informasaun seluk hosi fontes Ministériu Saúde (MS) nian informa katak empreza sira-ne’e tuir konkursu públiku no kumpri rekizitu sira hodi manan projetu sira-ne’e.

Dokumentu komprovadu ne’ebé Hatutan.com asesu mak hanesan tuir mai ne’e;