Hatutan.com, (06 Marsu 2024), Díli– Eis-profesór kontratadu sira  kontinua halo advokasia bá sira-nia direitu. Nune’e, Kuarta (06/03/2024), sira  nia reprezentante hamutuk na’in-hotu (7) bá Parlamentu Nasionál (PN) atu hasoru Komisaun G ne’ebé trata asuntu Edukasaun, Joventude Sidadania  no Kultura, hodi buka solusaun bá sira-nia problema.

Lee Mós: Xanana husu Profesór Kontratadu Ne’ebé Kontratu Remata Tuir Prosesu Rekrutamentu

Eis-profesór kontratadu sira bá Parlamentu Nasionál (PN), Kuarta (06/03/2024). Foto/Zita Menezes

Iha resintu uma-fukun PN ne’e, reprezentante eis-profesór sira liuhosi nia portavós Agostinho Pinto, husu atu reprezentante povu sira bele bá haree sira-nia maluk na’in-ualu (8) ne’ebé detein hela iha sela PNTL Munisípiu Díli.

Polísia Nasionál Timor-Leste (PNTL) Munisípiu Díli, Tersa 05 fulan-Marsu 2024, detein profesór kontratadu hamutuk na’in-ualu (8), inklui apoiante na’in-ida (la’ós profesór kontratadu) iha área Vila-Verde tanba deskonfia halo manifestasaun ilegál tanba  laiha karta pedidu koñesimentu bá autóridade seguransa.

“Ami nia prezensa iha PN atu relata de’it situasaun ne’ebé  akontese iha resintu Ministériu Edukasaun Vila-Verde nian ne’ebé maka komandu PNTL halo kapturasaun ilegalmente bá ami nia kolega na’in-ualu (8) ho kolega apoiante sira ne’ebé fó solidadriedade bá ami bazeia bá konvite ne’ebé ami fó,” Agostinho Pinto informa bá jornalista sira iha PN.

Maské nune’e sira la konsegé hasoru malu ho komisaun G ne’ebé reprezentante povu iha Parlamentu Nasionál  tanba tuir informasaun hosi téknika komisaun G katak Komisaun G labele hasoru eis-profesór kontratadu sira tanba sira tau ona iha ajenda katak loron 13 fulan-Marsu 2024 maka sei halo audiénsia dala ida ho Prezidente Parlamentu Nasionál Maria Fernanda Lay hodi buka solusaun.

“Ami haree katak sira finzidu tiha fali, tanba ne’e lamenta tebes bá ha’u nu’udár portavós no kolega eis-profesór kontratadu sira katak sira lamerese reprezentante povu iha Parlamentu Nasionál. Ami hasoru atu hato’o asuntu sira ne’e para sira bele bá haree ami kolega sira ne’ebé maka polísia detein. Krime saida ami nian kolega sira horisehik halo iha edukasaun ne’ebá, ne’e hahalok kolonializasaun sira nian,” portavós eis-profesór kontratadu sira ne’e afirma.

Sira  husu Parlamentu Nasionál liuliu Komisaun G atu bolu Ministra Edukasaun Dulce de Jesus hodi halo  justifikasaun bá problema simples ne’e, maibé to’o ohin loron fulan hitu no fulan ualu maibé seidauk rezolve .

Molok ne’e, Tersa (05/03/2024), liuhosi plenaria PN, Vise-Ministru asuntu Parlamentár Áderito da Costa Hugo haktuir manisfestasaun bele halo iha ne’ebé de’it tanba ida-ne’e maka direitu fundaméntal povu nian no estadu demókratiku ne’e tenke garante

“Naran katak  keta perturba no Governu ida-ne’e komprimitidu atu garante liberdade sidadaun nian atu espresa sira nia diretu ambiénte ne’e só bele iha bá ema ne’ebé komprende saida maka estadu direitu demókratiku entre funsaun loloos,” Áderito da Costa Hugo  hateten.

Jornalista Estajiária: Zita Menezes